Літва зачыніла мяжу з Беларуссю на месяц

«Мы прадстаўляем праекты, якія, на наш погляд, дапамогуць урэгуляваць напружаную сітуацыю на мяжы і ў аэрапортах. Лічым, што гэтыя змены павінны паслаць выразны сігнал нашаму нядобразычліваму суседу, які не робіць ніякіх намаганняў для вырашэння праблемы», — заявіў на пасяджэнні міністр унутраных спраў Літвы Уладзіслаў Кандратовіч.

Пункты «Каменны лог» і «Беняконі» застануцца недаступныя для звычайных беларусаў. Але «Каменны лог» працягне працаваць для дыпламатаў і асоб, што перавозяць дыппошту; асоб, якія едуць у Калінінградскую вобласць транзітам з Беларусі ці назад; грамадзян Літвы/краін ЕС і членаў іх сем’яў, уладальнікаў дзеючага ВНЖ Літвы, якія накіроўваюцца ў Літву, а таксама для ўладальнікаў гуманітарных віз.

Урад Літвы даручыў Службе аховы дзяржаўнай мяжы арганізаваць і забяспечыць выкананне прынятай меры.

«Сёння Літва сутыкаецца з гібрыднай атакай — трэба называць рэчы сваімі імёнамі», — заявіла прэм’ер-міністр Інга Ругінене. Яна дадала, што гэты крок створыць нязручнасці для часткі жыхароў, але ён неабходны, а ўлады «ставяцца да пытанняў бяспекі вельмі адказна» і лічаць прыярытэтам.

Зачыненне будзе дзейнічаць да 30 лістапада. Пасля літоўскі кабмін будзе вырашаць, падаўжаць ці не яго.