Пакістанскія айцішнікі папярэдзілі, што блакаванне інтэрнэту душыць ІТ-галіну

Як піша The Register, улады краіны адключалі інтэрнэт у часе масавых палітычных пратэстаў у маі 2022 года. Ад тых часоў блакаванні працягваюцца. У выніку пляцоўкі для фрылансераў накшталт Fiverr сталі апавяшчаць заказчыкаў, што пры працы з карыстальнікамі з Пакістана могуць узнікаць непаладкі. Адначасова мясцовыя ўлады падахвочваюць фрылансераў прадаваць свае паслугі праз інтэрнэт, каб рос экспарт ІТ-паслуг. Тут нават прапаноўвалася ўвесці падатковыя канікулы для падтрымкі фрылансераў, субсідаваць ім шырокапалосны інтэрнэт і медстрахоўку.

Гэта не перашкодзіла ўладам уставіць палкі ў колы фрылансерам у гэтым жніўні, калі быў запушчаны свайго роду нацыянальны фаервол, хоць прызначаны ён быў перш за ўсё для прадухілення доступу да непажаданага кантэнту. Ён прывёў да моцнага зніжэння хуткасці злучэння, што моцна ўскладніла жыццё фрылансерам і анлайн-кампаніям. Ужо тады ў P@SHA заклікалі не прыносіць ІТ «у ахвяру няправільна расстаўленым прыярытэтам». Але пытанне так і не вырашылася.

Акрамя гэтага, у краіне хадзілі чуткі аб магчымай забароне — часткова з рэлігійных прычын — VPN-сэрвісаў. У асацыяцыі паспяшаліся заявіць, што такая мера нашкодзіць тэхналагічным кампаніям, кол-цэнтрам і арганізацыям па аўтсорсінгу бізнэс-працэсаў, паколькі адгукнецца стратай кліентаў. Гэта прывядзе да «непапраўных наступстваў» і «эфекту даміно» ў іншых сектарах эканомікі. Паводле ацэнак P@SHA, сёлета ІТ-экспарт Пакістана мае скласці $3,2 млрд. Улады пасля гэтага заявілі, што асцярогі з нагоды бану VPN з’явіліся праз няправільна зразуметую памылку друку ва ўрадавым дакуменце.