«Стаўкі высокія»: СЕО Google заклікаў супрацоўнікаў паднапружыцца ў 2025 годзе
18 снежня кіраўніцтва Google правяло стратэгічны мітынг з супрацоўнікамі. Іх рыхтавалі да ўзмацнення канкурэнцыі, увагі рэгулятараў і да прарываў у АІ у надыходзячым годзе, піша CNBC.
«Я думаю, 2025 год будзе вельмі важным. Нам вельмі неабходна ўсвядоміць тэрміновасць моманту, а кампаніі — паскорыцца. Стаўкі высокія. Гэта пераломныя моманты», — сказаў гендырэктар Google Сундар Пічаі. Ён дадаў, што ў 2025 годзе супрацоўнікі павінны асабліва засяродзіцца на ўвасабленні карыснага патэнцыялу АІ і заняцца развязаннем праблем, якія ёсць у карыстальнікаў.
Як адзначае CNBC, 2024 год стаў для Google адным з самых складаных ад часу яе выхаду на біржу дваццаць гадоў таму. Выручка Google ад пошукавай рэкламы і воблачных сэрвісаў расце, як і канкурэнцыя на ключавых для яе рынках — напрыклад, у выглядзе інструментаў на базе генератыўнага АІ. Яна ўкладвае велізарныя грошы ў фірмовую мадэль Gemini. Пічаі абвясціў, што цяпер прыярытэтам для кампаніі з’яўляецца «пабудова вялікага новага бізнэсу» — у прыватнасці, развіццё праграмы Gemini. Паводле ацэнак кіраўніцтва, яна стане наступнай праграмай, якая дасягне паўмільярда карыстальнікаў. Цяпер у кампаніі такіх 15 штук.
«Праграма Gemini набірае абароты, асабліва апошнія некалькі месяцаў. Але нам ёсць над чым папрацаваць у 2025 годзе, каб скараціць разрыў і выйсці ў лідары», — сказаў Пічаі. Ён дадаў, што маштабаванне Gemini будзе галоўнай задачай для Google налета.
Таксама супрацоўнікаў запэўнілі, што Google не будзе задзіраць падпіску да $200, «як іншыя кампаніі». Тут адзначылі, што пакуль лічаць цяперашнія $20 справядлівай цаной.
Між тым у кампаніі спее незадаволенасць карпаратыўнай культурай і бачаннем будучага Пічаі, а звонку як ніколі лютуюць рэгулятары. Напрыклад, у жніўні суд у ЗША прызнаў яе манаполіяй на пошукавым рынку, а ў лістападзе ад яе запатрабавалі адмовіцца ад Chrome. Таксама яе абвінавачваюць у манапалізацыі рэкламнага рынку.
Пра пільную ўвагу рэгулятараў у розных краінах свету згадваў і Пічаі. Ён патлумачыў гэта памерам і паспяховасцю кампаніі, а таксама тым, што тэхналогіі ў прынцыпе моцна ўплываюць на грамадства. Менавіта таму, паводле слоў Пічаі, цяпер для Google як ніколі важна не адцягвацца.
Читать на dev.by