Лукашэнка хоча стварыць спецыяльную ІТ-кампанію
У Беларусі можа з’явіцца спецыяльная ІТ-кампанія пад патрэбы банкаў. Яе, а таксама цяжкасці з трансгранічнымі плацяжамі і ўвядзенне сістэмы імгненных плацяжоў, абмяркоўвалі на сённяшняй нарадзе Аляксандра Лукашэнкі з кіраўнікамі банкаў.
«Банкам варта ўзмацніць працу па ўкараненні ў банкаўскую дзейнасць рашэнняў, пабудаваных на выкарыстанні штучнага інтэлекту. Гэта дазволіць павысіць эфектыўнасць унутраных банкаўскіх працэсаў і пераразмеркаваць працоўныя рэсурсы на вырашэнне складаных і стратэгічных пытанняў», — заявіў палітык.
Ён лічыць, што на фоне сусветных трэндаў у сектары беларускія банкі павінны развіваць выкарыстанне біяметрыі. Акрамя таго, неабходна стварыць уласную ІТ-кампанію, якая знізіць высокую залежнасць ад пастаўшчыкоў гэтых паслуг. Лукашэнка таксама казаў пра патрэбу ў карпаратыўных універсітэтах, якія будуць рыхтаваць спецыялістаў для Нацбанка «яшчэ са студэнцкай лавы на стыку некалькіх спецыяльнасцяў».
«І ў цэлым банкам трэба арыентавацца на атрыманне максімальных станоўчых вынікаў, якія здольныя даць сучасныя тэхналогіі. Цыфравізацыя тут не дзеля цыфравізацыі, а для рэальнага эканамічнага эфекту», — сказаў ён.
Таксама Лукашэнка запатрабаваў да канца года ўвесці ў строй сістэму імгненных плацяжоў, каб даць людзям просты і зручны спосаб аплаты тавараў, работ і паслуг. У красавіку ў Нацбанку распавядалі, што збіраюцца ўжо ў гэтым годзе ўвесці сістэму аплаты па QR-кодзе.
Читать на dev.by