«Пастараюцца ўсіх вывезці». Як на мабілізацыю рэагуюць у ІТ-кампаніях
Пасля абвяшчэння ў Расіі «частковай» мабілізацыі позвы сталі прыходзіць і айцішнікам.Запыталіся ў беларускіх спецыялістаў, якія працуюць у расійскіх ІТ-кампаніях, якая абстаноўка ў камандзе.
UPD 23.09 Мінабароны РФ удакладніла, якія катэгорыі спецыялістаў не падпадуць пад частковую мабілізацыю. Сярод іх апынуліся айцішнікі (але не ўсе).
«Зрабілі гайд, як знайсці пацверджанне, што не годны»
— Я беларуска, працую каля года рэкруцёркай у расійскай геймдэў-кампаніі. Штат 400 чалавек.
Усе ў лёгкім шоку ад таго, што адбываецца. Фаўндар заявіў, што кампанія не дапусціць мабілізацыі супрацоўнікаў. Усіх, хто яшчэ працуе ў Расіі і не скарыстаўся магчымасцю рэлакавацца (а гэта каля 20%), пастараюцца вывезці.
Для тых, у каго няма замежнага пашпарта, асноўныя лакацыі — Арменія, Кыргызстан. У каго ёсць, могуць з’ехаць у любыя краіны, куды адкрытая віза або куды віза не патрэбная.
Таксама кампанія выпусціла для супрацоўнікаў гайд з «гарачымі пытаннямі»:
- як тэрмінова атрымаць пад’ёмныя для пераезду;
- дзе выгадней і хутчэй за ўсё памяняць валюту;
- ці трэба звальняцца для рэлакейту (цяпер не, усё пераафармленне прапануецца дыстанцыйна);
- як даведацца, ці з’яўляешся ты ваеннаабавязаным і што табе пагражае;
- як атрымаць псіхалагічную дапамогу;
- рэкамендацыя, як самастойна купіць квіткі, калі ёсць рызыкі (кампанія пакрые выдаткі);
- рэкамендацыі, як знайсці пацверджанне таго, што ты не годны.
«Калегі атрымалі позвы, думаюць, што рабіць»
— Я беларус, працую аддалена з Казахстана на расійскую кампанію. Распрацоўваем рашэнні для телекама.
Трое калегаў, якія жывуць і працуюць у Маскве, ужо атрымалі позвы з’явіцца ў ваенкамат. Аднаго хочуць адправіць на ваенныя зборы. Але яго сям’я лічыць, што на вайну не павінныя забраць. У яго няма баявога досведу.
Двое іншых калегаў пакуль думаюць, што рабіць далей. Варыянт сесці ў турму, каб потым трапіць у ПВК і загінуць з верагоднасцю 99,9% ніхто не разглядае.
«Мы ўсе на нервах, але кіраўніцтва нічога не робіць»
— Працую ў невялікай ІТ-кампаніі (распрацоўшчык софту). Штат 30 чалавек, 90% каманды — мужчыны 25-45 гадоў.
Пасля абвяшчэння мабілізацыі кіраўніцтва паведаміла, што «рэчы, якія адбываюцца ў краіне, у кампаніі амаль нікога не закрануць», і зрабіла выгляд, што ўсё выдатна і наогул не пра нас.
Але ўсе шараговыя супрацоўнікі на нервах.
Знаёмыя з «каля ІТ» (у асноўным вытворчыя кампаніі) з’язджаюць на машынах у Казахстан. Кампаніі, якія бачылі рызыкі, яшчэ да ўсяго гэтага вывезлі супрацоўнікаў. Але нашая не захацела/не змагла.
Я з верагоднасцю 80% не траплю ў першую хвалю мабілізацыі. Але ехаць у нікуды таксама не аптымальны варыянт.
Акрамя таго, у многіх немаладыя бацькі, што абцяжарвае пераезд.
«Арганізавалі чартар у Казахстан»
— Працую ў буйной ІТ-кампаніі з офісамі ў Расіі і за мяжой. Штат каля 3,5 тысяч супрацоўнікаў, але колькі з іх у Расіі, мне складана сказаць.
Пасля аб’явы пра частковую мабілізацыю кампанія настойліва рэкамендавала выехаць усім, хто патэнцыйна трапляе пад прызыў, асабліва ў першую хвалю мабілізацыі. Супрацоўнікам паабяцалі кампенсаваць выдаткі.
Пазаўчора арганізавалі чартарны рэйс у Казахстан.
«Сказалі не адцягвацца на навіны пра мабілізацыю»
— Працую аддалена з Беларусі на расійскую ІТ-кампанію, сам беларус. Гэта мая першая праца ў ІТ, кампанію выбіраў якраз праз магчымасць працаваць аддалена.
Гендырэктар у агульным чаце папрасіў не адцягвацца на навіны пра мабілізацыю. Як толькі сітуацыя стане больш зразумелай, ён паведаміць або правядзе сустрэчу. У цэлым працуем як раней. У працоўных чатах тэмы асабліва не абмяркоўваюць. Панікі няма.
Учора ўсім, хто плануе з’язджаць, прапанавалі звяртацца па дапамогу. Нашая партнёрская кампанія ўсім супрацоўнікам прапанавала для пераезду Узбекістан. Але якая канкрэтна будзе дапамога, я не ведаю. Напрыклад, у сакавіку ў сувязі з праблемамі ў Беларусі мне прапаноўвалі з’ехаць у Грузію і часткова аплаціць арэнду жытла. Але на той момант у Грузіі арэнда вельмі ўзляцела, а вялікай небяспекі ў Беларусі для мяне не было.
Цяпер я сам планую з’ехаць, што праўда, ёсць шэраг праблем. Па-першае, заробак у валюце swift-пераказамі да мяне не даходзіць ужо другі месяц. Кампанія плаціць спраўна і ў тэрмін, але на нейкім этапе банкі-рэспандэнты проста замарожваюць пераказ праз санкцыі. Па-другое, у мяне адносна невысокі заробак для здымання жытла ў Грузіі пры існых умовах і цэнах у 600-1000 долараў. Па-трэцяе, гэта водгукі знаёмых пра «гасціннасць» у Грузіі ў плане бытавых пытанняў, працы з банкамі.
«Альбо з’ехаць, альбо купіць ваенны білет»
— Працую ў Яндэксе. Абстаноўка ў нас як і ва ўсіх. Хтосьці баіцца і шукае квіткі ў іншыя краіны. Досыць шмат тых, хто шукае, дзе і як купіць ваенны білет.
Читать на dev.by