Макрон прапанаваў адключаць інтэрнэт падчас беспарадкаў у краіне

На сустрэчы з мэрамі гарадоў, пацярпелых ад беспарадкаў, Макрон заявіў, што ў крызісных сітуацыях улады Францыі маглі б звяртацца да абмежаванняў працы інтэрнэту, аж да яго адключэння. «Нам трэба падумаць пра сацыяльныя сеткі, пра забароны, якія мы мусім накласці. І ў моманты, калі крызісы абвастраюцца, нам, магчыма, давядзецца паставіць сябе ў становішча, каб рэгуляваць іх або адключаць», — дадаў ён.

Таксама прэзідэнт расказаў пра планы ўвесці ў краіне надзвычайнае становішча, каб хутчэй правесці аднаўленне разбуранага падчас беспарадкаў. Ідэю Макрона пачалі актыўна крытыкаваць іншыя палітычныя сілы, лічачы, што абмежаванне працы інтэрнэту — гэта замах на правы чалавека, а адключэннямі займаюцца аўтарытарныя краіны, такія як Расія і Іран.

Беспарадкі ў Францыі пачаліся пасля 27 чэрвеня — у гэты дзень у парыжскім прыгарадзе Нантэры паліцэйскі забіў 17-гадовага Наэля М., які знаходзіўся за стырном аўтамабіля і не спыніўся на патрабаванне паліцыі. Пратэсты пачаліся ў Нантэры і распаўсюдзіліся на іншыя гарады. За шэсць дзён былі затрыманыя 3625 чалавек, у тым ліку 1124 непаўналетніх.