Маск рызыкуе страціць брэнды з-за DOGE — і паабяцаў «працаваць 24/7»

«Я вяртаюся да працы 24/7, сплю ў канферэнц-залах, серверных і на заводах. Я павінен быць максімальна засяроджаны на X, xAI і Tesla, паколькі мы ўкараняем крытычна важныя тэхналогіі», — напісаў Маск у пасту. Збой X закрануў карыстальнікаў не толькі ў ЗША, але і ў Германіі, Іспаніі, Францыі, Індыі, Канадзе, Аўстраліі і Вялікабрытаніі, паводле дадзеных Downdetector.

Рашэнне Маска вярнуцца да інтэнсіўнай працы ў сваіх кампаніях з’явілася пасля крытыкі ўдзелу мільярдэра ў адміністрацыі Дональда Трампа. Бізнесмен узначальваў так званае Міністэрства дзяржаўнай эфектыўнасці (DOGE), мэтай якога было скарачэнне дзясяткаў тысяч працоўных месцаў і ануляванне кантрактаў і грантаў на мільярды долараў.

Яго палітычныя погляды выклікалі хвалю пратэстаў супраць Tesla у ЗША і Еўропе, што прывяло да падзення продажаў: летась аўтавытворца ўпершыню паведаміў пра зніжэнне гадавых паставак. Інвестары выказвалі заклапочанасць тым, колькі часу Маск прысвячае Tesla, адцягваючы сваю ўвагу на палітычную дзейнасць.

Каб супакоіць інвестараў, у мінулым месяцы бізнесмен абвясціў, што з мая скарачае свой удзел у DOGE да аднаго-двух дзён на тыдзень. На нядаўняй сустрэчы Маск пацвердзіў, што яго праца па «навядзенні парадку ў фінансах урада ў асноўным завершана», і ён мае намер засяродзіцца на развіцці сваіх кампаній.

Прафесар маркетынгу Скот Гэлоўэй заявіў, што ўдзел Маска ў працы адміністрацыі Трампа стаў «адным з найбуйнейшых знішчэнняў брэнда» ў гісторыі. Навуковец адзначыў, што мільярдэр адштурхнуў асноўную аўдыторыю свайго вытворцы электрамабіляў Tesla, аднаго з ключавых актываў Маска, звязаўшы сябе з прэзідэнтам, чые прыхільнікі не зацікаўлены ў электрамабілях.

Гэлоўэй прывёў дадзеныя апытанняў, згодна з якімі рэпутацыя Tesla упала з восьмага месца сярод самых паважаных брэндаў у 2021 годзе да 95-га ў 2025 годзе. «Ён адштурхнуў не тых людзей», — заўважыў Гэлоўэй. — «Тры чвэрці рэспубліканцаў ніколі не падумаюць пра куплю электрамабіля. Такім чынам, ён зблізіўся з людзьмі, якія не зацікаўлены [у гэтым]».

У апошнія месяцы Маск умешваўся ў розныя еўрапейскія палітычныя падзеі, у тым ліку федэральныя выбары ў Германіі і дыскусіі пра злачыннасць у Вялікабрытаніі. Гэта выклікала негатыўную рэакцыю ў Еўропе, прыбытковым рынку электрамабіляў, і прывяло да таго, што кітайскі канкурэнт Tesla, кампанія BYD, упершыню абагнала яе па продажах на кантыненце ў красавіку.