Meta і Google упершыню ад 2014 года страцілі дамінуючую пазіцыю на рынку лічбавай рэкламы, піша Financial Times. Дуаполію пахіснулі канкурэнты, уключна з Amazon, TikTok, Microsoft і Apple.
Meta і Google упершыню ад 2014 года страцілі дамінуючую пазіцыю на рынку лічбавай рэкламы, піша Financial Times. Дуаполію пахіснулі канкурэнты, уключна з Amazon, TikTok, Microsoft і Apple.
Паводле падлікаў аналітыкаў Insider Intelligence, доля двух ключавых гульцоў у агульнай рэкламнай выручцы ў ЗША да канца года ўпадзе на 2, 5 п. п. да 48, 4%.
Паказчык зніжаецца ўжо пяць гадоў запар — на піку ў 2017 годзе ён дасягаў 54,7% і, паводле прагнозаў, у 2024-м скароціцца да 43,9%. У цэлым па планеце доля дзвюх кампаній знізілася за год на 1 п. п. да 49,5%.
Meta і Google знаходзяцца пад пільнай увагай рэгулятараў ЗША і Еўропы: іх крытыкуюць за антыканкурэнтныя практыкі і прасоўванне ўласных прадуктаў на шкоду альтэрнатыўным. Разам з тым Amazon і Apple пашыраюць каманды, якія займаюцца рэкламай. Netflix разам з Microsoft збіраецца запусціць новы тарыф, які будзе даступнейшым за кошт размяшчэння рэкламы.
Марк Цукерберг вінаваціць у падзенні рэкламнай выручкі рост папулярнасці кітайскага відэасэрвісу TikTok, а таксама Apple і новаўвядзенні ў частцы прыватнасці, якія былі ўведзеныя ў адной з версій iOS: карыстальнікі цяпер павінныя даваць актыўную згоду на трэкінг, які павышае эфектыўнасць падбору аб’яў, а значыць і даходы Meta. Стваральнік Facebook таксама абвінавачвае Apple у манапалізме і падаўленні інавацый. Акцыі Meta за апошнія 15 месяцаў страцілі амаль 2/3 кошту.
Google ад новаўвядзенняў Apple пацярпела менш, паколькі таргетуе рэкламу на запыты, якія ўводзяцца карыстальнікамі ў яе пашукавік. Тым не менш Apple мае свой аналаг Google Карт, пашукавік на айфонах, і, на думку экспертаў, у будучыні яе рэкламны бізнэс зможа скласці канкурэнцыю Google. Акрамя таго, у яе ёсць аўтарытэт і давер спажыўцоў, якія могуць даць ёй перавагу.
Рэкламныя даходы Apple выраслі ад $2,2 млрд у 2018 годзе да больш як $7,5 млрд — у гэтым. Гэта толькі 1,2% сусветнага рынку, але больш, чым у Snapchat і Pinterest разам узятых. Паводле прагнозаў, у 2026 годзе лічба можа вырасці да $30 млрд. У верасні FT даведаўся, што Apple хоча амаль удвая павялічыць штат у падраздзяленні лічбавай рэкламы, якое імкліва развіваецца.
Як адзначаюць эксперты, Amazon і іншыя рытэйлеры ўсвядомілі, што могуць зарабляць на велізарных масівах даных пра сваіх спажыўцоў — прычым яшчэ больш, чым на продажы ўласна тавараў анлайн. Кампанія пачала рашуча прабівацца на рынак лічбавай рэкламы ў 2015-м. І калі тады яе рэкламныя даходы складалі менш за $1 млрд, то паводле вынікаў гэтага года маюць дасягнуць $38 млрд.
У Insider Intelligence лічаць, што ў 2023 годзе рэкламны бізнэс Google і Meta ў ЗША вырасце толькі на 3% і 5% адпаведна. Для Amazon прагназуюць 19%-ны рост, для Apple — 26%, для Spotify — 30%, для TikTok — 36%, а для Walmart — 42%.
Рэлацыраваліся? Цяпер вы можаце каментаваць без верыфікацыі акаўнта.