Meta маркіруе сапраўдныя фатаграфіі пазнакай «Зроблена АІ»

Былы фатограф Белага дома Піт Соўза паведаміў, што спрабаваў выдаліць гэтую пазнаку, але не змог. На яго думку, алгарытм палічыў здымак генератыўным, так як фатограф абрэзаў яго ў софце Adobe і захаваў у фармаце JPEG. Журналісты PetaPixel знайшлі прычыну фальшывага спрацоўвання: пазнака з’яўляецца, калі пры апрацоўцы фатаграфій выкарыстоўваліся праграмы на аснове генератыўнага АІ, напрыклад, Adobe Generative Fill.

Журналісты выдалілі з дапамогай гэтай праграмы плямку на фатаграфіі — і Instagram дадаў да здымка пазнаку, што фатаграфія створаная АІ. Тады здымак адкрылі ў Photoshop, скапіявалі і ўставілі ў дакумент з чорным фонам. Затым файл захавалі і гэты здымак апублікавалі ў сацсетцы — пазнака пры публікацыі не з’явілася. Прадстаўнік Meta Кейт Маклафлін заявіла, што кампанія пераацэніць свой падыход, каб «пазнакі адлюстроўвалі аб’ём АІ пры стварэнні выявы».

У лютым кампанія Meta абвясціла, што напярэдадні перадвыбарнага сезона гэтага года пачне дадаваць пазнакі «Зроблена з дапамогай АІ» да фатаграфій, загружаных у Facebook, Instagram і Threads. У прыватнасці, кампанія заявіла, што будзе дадаваць пазнаку да фатаграфій, згенераваных штучным інтэлектам з дапамогай інструментаў Google, OpenAI, Microsoft, Adobe, Midjourney і Shutterstock. У Adobe існуе ўласны спосаб маркіроўкі генератыўных выяаў Content Credentials.