Meta не змагла набыць стартап сузаснавальніка OpenAI — і цяпер перацягвае яго топаў

Як паведамляе CNBC са спасылкай на дасведчаныя крыніцы, Meta ў пачатку года спрабавала купіць Safe Superintelligence, ацэнены ў $32 мільярды. Аднак Суцкевер адмовіўся не толькі ад угоды, але і ад прапаноў аб асабістым пераходзе ў Meta.

Пасля гэтага Цукерберг пераключыўся на перамовы з Даніэлем Гросам, цяперашнім генеральным дырэктарам Safe Superintelligence, і яго бізнес-партнёрам, былым кіраўніком GitHub Натам Фрыдманам.

Абодва ў хуткім часе далучацца да Meta і будуць працаваць над новымі прадуктамі пад кіраўніцтвам Аляксандра Ванга, заснавальніка Scale AI, якога Meta прыцягнула на мінулым тыдні ў межах угоды на $14,3 мільярда. Як паведамляецца, Meta таксама атрымае долю ў венчурнай кампаніі NFDG, заснаванай Гросам і Фрыдманам.

Гэты крок — частка маштабнай кампаніі па найме ШІ-талентаў, якую Meta вядзе ва ўмовах жорсткай канкурэнцыі з Google, OpenAI, Microsoft і іншымі. Як раней распавядаў генеральны дырэктар OpenAI Сэм Альтман, Meta прапаноўвала інжынерам OpenAI бонусы да $100 мільёнаў, аднак «ні адзін з нашых лепшых супрацоўнікаў не пагадзіўся».

Тым часам Meta ўжо ўклала мільярды ў новыя ініцыятывы: угода са Scale AI дала ёй 49% у стартапе, а яе канкурэнты не адстаюць. OpenAI, напрыклад, наняла дызайнера iPhone Джоні Айва, а Microsoft прыцягнула сузаснавальніка DeepMind Мустафу Сулеймана пасля паглынання Inflection AI.

З пераходам Гроса Meta ўзмацняе каманду: ён — дасведчаны прадпрымальнік, заснавальнік пашукавіка Cue (набыты Apple у 2013), былы кіраўнік Siri і партнёр у Y Combinator. Яго паплечнік Фрыдман кіраваў GitHub пасля яго набыцця Microsoft і заснаваў некалькі паспяховых стартапаў. Іх венчурны фонд NFDG інвеставаў у такія кампаніі, як Coinbase, Figma і Character.AI.