Meta ахвяравала на інаўгурацыю Трампа $1 млн

Паводле даных CNN, Цукерберг імкнецца гуляць актыўнейшую ролю ў фармаванні тэхналагічнай палітыкі новай адміністрацыі. Сустрэча Цукерберга з Трампам і ахвяраванне з’яўляюцца рэзкім паваротам у іх адносінах. Раней Трамп абвінавачваў Meta ў абмежаванні яго і іншых кансерватыўных галасоў на сваіх платформах. У 2021 годзе Meta заблакавала акаўнты Трампа ў Facebook і Instagram пасля штурму Капітолія яго прыхільнікамі. Акаўнты былі разблакаваныя толькі на пачатку 2023 года.

Трамп таксама асабіста крытыкаваў Цукерберга, пагражаючы яму турмой за «змову» супраць яго ў часе выбараў 2020 года. У сакавіку гэтага года Трамп назваў Facebook «ворагам народа» ў інтэрв’ю CNBC. У жніўні ён паабяцаў, што Цукерберг «правядзе рэшту жыцця ў турме», калі паспрабуе паўплываць на прэзідэнцкія выбары 2024 года. Аднак летам гэтага года Цукерберг правёў як мінімум дзве асабістыя тэлефонныя размовы з Трампам. У адной з іх Цукерберг пазычыў Трампу ўсяго найлепшага і сказаў, што «моліцца» за яго пасля замаху.

Ахвяраванне Meta ў інаўгурацыйны фонд Трампа было зробленае праз два тыдні пасля сустрэчы Цукерберга з ім у Мар-а-Лага ў Фларыдзе. У часе сустрэчы Цукерберг падарыў Трампу разумныя акуляры Ray Ban ад Meta. Ахвяраванні ў інаўгурацыйныя камітэты, што не маюць абмежаванняў па суме ўзносаў, папулярныя сярод кампаній і прыватных асоб, якія імкнуцца заручыцца падтрымкай новай адміністрацыі.