Meta звольніла дзясяткі супрацоўнікаў, якія трацілі купоны на ежу на пракладкі і келіхі для віна
Кампанія звольніла каля двух дзясяткаў супрацоўнікаў у Лос-Анджэлесе за нямэтавае выкарыстанне купонаў на ежу: работнікі трацілі ваўчары на бытавыя прадметы і забавы.
Як і многія тэхналагічныя кампаніі Крэмніевай даліны, Meta прапаноўвае бясплатнае харчаванне для супрацоўнікаў у сваіх буйных офісах. Аднак супрацоўнікам невялікіх офісаў, такіх як хаб Meta ў Лос-Анджэлесе, выдаюць купоны на ежу праз Uber Eats або Grubhub. Работнікі могуць траціць $20 на сняданак, $25 на абед і $25 на вячэру, але выкарыстоўваць купоны для куплі іншых тавараў забаронена.
Паводле даных крыніцы ў кампаніі, знаёмай з сітуацыяй, звольненыя супрацоўнікі сістэматычна парушалі правілы, выкарыстоўваючы купоны не па прызначэнні. Тым, хто парушаў правілы толькі зрэдку, былі зробленыя вымовы. Некаторыя супрацоўнікі аб’ядноўвалі свае купоны, а іншыя заказвалі ежу дадому, хоць Meta дазваляе выкарыстоўваць купоны толькі для заказаў у офіс.
На платформе ананімных паведамленняў Blind адзін з былых супрацоўнікаў Meta прызнаўся, што купляў зубную пасту і гарбату ў аптэцы на купоны, тлумачачы гэта тым, што ў тыя дні, калі ён не абедаў у офісе, ён не хацеў, каб купон знікаў дарма. Паводле слоў супрацоўшчыка, пасля таго як HR-аддзел Meta пачаў расследаванне, ён прызнаў парушэнне, але не чакаў звальнення.
Meta ўжо скараціла каля 21 000 працоўных месцаў ад лістапада 2022 года ў рамках аптымізацыі выдаткаў. Марк Цукерберг назваў 2023 год «годам эфектыўнасці»: нядаўна прайшлі скарачэнні ў WhatsApp, Instagram і Reality Labs — аддзеле распрацоўкі віртуальнай рэальнасці.
Читать на dev.by