Аддзел навін 28 жніўня 2024, 15:38

Meta закрывае кастамную AR-студыю

Meta згортвае платформу Spark, якая дазваляла карыстальнікам ствараць уласныя эфекты ў дапоўненай рэальнасці для Instagram і Facebook.

Пакінуць каментарый

Meta згортвае платформу Spark, якая дазваляла карыстальнікам ствараць уласныя эфекты ў дапоўненай рэальнасці для Instagram і Facebook.

Meta працягне ствараць уласныя AR-эфекты для карыстальнікаў, але фільтры, створаныя іншымі распрацоўшчыкамі, будуць выдаленыя. Сваё рашэнне кампанія тлумачыць неабходнасцю аддаваць прыярытэт прадуктам, якія будуць больш патрэбныя яе карыстальнікам і карпаратыўным кліентам.

Аўтараў AR-кантэнту навіна вельмі расчаравала. Для многіх Spark з’яўляецца вельмі важным інструментам: у некаторых на аснове яго створана палова работ і выбудавана супрацоўніцтва з кліентамі.

Інструмент быў запушчаны 7 гадоў таму. Ён цалкам спыніць працу 14 студзеня 2025 года. Business Insider адзначае, што закрыццё студыі можа падарваць канкурэнтныя пазіцыі Meta ў барацьбе са Snapchat і TikTok. У абедзвюх пляцовак ёсць інструменты і праграмы ўзнагароджання для стваральнікаў AR-кантэнту.

Апошнім часам Meta засяроджаная на АІ і сямействе вялікіх моўных мадэляў Llama. Таксама яна развівае комплексныя прадукты, напрыклад, акуляры сумесна з Ray-Ban. У верасні Meta мае паказаць свае першыя сапраўдныя AR-акуляры.