Microsoft нарошчвае распрацоўку ШІ, каб канкураваць з OpenAI

Microsoft, якая ўклала каля $14 мільярдаў у OpenAI, цяпер імкнецца дыверсіфікаваць свае ШІ-тэхналогіі. Паводле звестак The Information, кампанія распрацавала ўласныя мадэлі для разважанняў, параўнальныя з o1 і o3-mini ад OpenAI. Пры гэтым OpenAI, паводле чутак, адмовілася дзяліцца з Microsoft тэхнічнымі дэталямі працы o1, што ўзмацніла напружанасць паміж партнёрамі.

Паралельна Microsoft стварыла сямейства мадэляў пад назвай MAI, якія могуць канкураваць з распрацоўкамі OpenAI. Кампанія разглядае магчымасць надання доступу да іх праз API ужо ў гэтым годзе. Акрамя таго, Microsoft праводзіць тэсты альтэрнатыўных мадэляў ШІ ад xAI, Meta, Anthropic і DeepSeek, каб патэнцыйна замяніць тэхналогіі OpenAI.

Для ўмацавання сваіх пазіцый Microsoft наняла сузаснавальніка DeepMind і Inflection Мустафу Сулеймана, які цяпер узначальвае кірунак ШІ ў кампаніі. Паводле звестак выдання, яго каманда завяршыла навучанне мадэляў MAI, і навінкі дэманструюць вынікі, блізкія да вядучых распрацовак OpenAI і Anthropic у стандартных тэстах.

Асаблівая ўвага надаецца мадэлям для разважанняў, якія выкарыстоўваюць тэхніку «ланцужка думак» — працэс, што дазваляе вырашаць складаныя задачы з прамежкавымі этапамі аналізу. Такія распрацоўкі могуць стаць прамым канкурэнтам прадуктаў OpenAI. Ужо цяпер каманда Сулеймана эксперыментуе з заменай мадэляў OpenAI на MAI у Copilot.