Microsoft абвінаваціла ЕС у найбуйнейшым тэхнічным збоі ў гісторыі

Праграма Falcon ад CrowdStrike, прызначаная для абароны ад кібератак, мае прывілеяваны доступ да ядра сістэмы. Гэта дазволіла апдэйту «пакласці» 8,5 млн камп’ютараў пад кіраваннем Windows ва ўсім свеце. У выніку авіякампаніі скасоўвалі рэйсы, не працавалі бескантактныя плацяжы, парушылася праца бальніц і экстранных службаў.

Microsoft сцвярджае, што не мела магчымасці ўносіць змены бяспекі, якія б заблакавалі абнаўленне CrowdStrike, праз пагадненне з Еўрапейскай камісіяй ад 2009 года. Тады ў рэгіёне супраць кампаніі ўжо вялося антыманапольнае расследаванне праз яе дамінаванне на рынку браўзераў, і яна пагадзілася дазволіць некалькім пастаўшчыкам ІБ-прадуктаў усталёўваць софт з такім доступам. Пры гэтым у Microsoft ёсць фірмовая альтэрнатыва Falcon — Windows Defender.

Apple наадварот закрыла доступ да ядра сваіх камп’ютараў для чужых у 2020 годзе, каб павысіць іх бяспеку і надзейнасць. Прадстаўнік Microsoft патлумачыў выданню, што рэдмандская кампанія не магла гэтага зрабіць праз тую ж угоду з ЕС.

Між тым ЕС спрабуе прымусіць Apple прыадкрыць сваю экасістэму. На гэта накіраваны не так даўно прыняты тут Закон аб лічбавых рынках, які абавязвае кампанію дапусціць альтэрнатыўныя крамы праграм і браўзеры для айфонаў. Apple настойвае, што гэта зробіць гаджаты і іх карыстальнікаў больш уразлівымі.

У камісіі па нацбяспецы ў Палаце прадстаўнікоў ужо заклікалі СЕО CrowdStrike Джорджа Курца адказаць за інцыдэнт.