Microsoft абвінаваціла Кітай у сачэнні за крытычнай інфраструктурай ЗША

Паводле даных Reuters, хакерская група пад назвай Volt Typhoon, або Bronze Silhouette, якая месціцца ў Кітаі, дзейнічае ад сярэдзіны 2021 года і займаецца «шпіянажам і зборам інфармацыі». Microsoft сцвярджае, што хакеры імкнуцца атрымаць доступ да крытычна важных сістэм і як мага даўжэй яго захоўваць, не выдаючы сваёй прысутнасці. У спісе мэтаў хакераў сектары сувязі, вытворчасці, камунальных паслуг, транспарту, будаўніцтва, марскога суднаходства, урада, інфармацыйных тэхналогій і адукацыі.

Кампанія адзначае, што выяўленне і ліквідацыя наступстваў пранікнення хакераў у розныя сістэмы «можа выявіцца складанай задачай». Для крадзяжу інфармацыі групоўка выкарыстоўвае спалучэнне розных метадаў, у тым ліку бясфайлавыя шкодныя праграмы і атрыманне даных уліковых запісаў. На думку экспертаў Microsoft, мэтай хакераў з’яўляецца распрацоўка магчымасцей, якія «могуць парушыць крытычна важную інфраструктуру сувязі паміж ЗША і азіяцкім рэгіёнам падчас будучых крызісаў».

Volt Typhoon лічыцца адной з найбуйнейшых вядомых кітайскіх груповак кібершпіянажу, яна працуе не толькі на ЗША, але і на іншыя рэгіёны. Афіцыйная прадстаўніца міністэрства замежных спраў Кітая Маа Нін заявіла, што ў хакерскіх атаках вінаваты Вашынгтон і што «Злучаныя штаты — гэта імперыя хакерскіх атак».