Microsoft прэзентавала праект NLWeb — для ператварэння сайтаў у ШІ-аплікацыі

Праект NLWeb дае магчымасць вэб-распрацоўшчыкам ствараць чат-ботаў, якія дапамагаюць карыстальнікам узаемадзейнічаць з кантэнтам. Напрыклад, інтэрнэт-крама можа прапанаваць бота для падбору вопраткі для падарожжа, а кулінарны сайт — для рэкамендацый страў да рэцэпту.

NLWeb выкарыстоўвае існуючыя вэб-стандарты, такія як Schema.org і RSS, якія прымяняюцца для SEO і індэксацыі кантэнту. Праект таксама падтрымлівае стандарт Model Context Protocol (MCP) ад Anthropic, што дазваляе сайтам дзяліцца кантэнтам з ШІ-платформамі і агентамі.

Microsoft параўноўвае праект з HTML, падкрэсліваючы яго патэнцыял для стварэння семантычна насычаных і інтэрактыўных вэб-інтэрфейсаў. Існуе вялікая верагоднасць, што распрацоўка заснаваная на тэхналогіях OpenAI, з якой Microsoft цесна супрацоўнічае. У 2023 годзе OpenAI распрацоўвала падобныя рашэнні для партнёраў, такіх як Condé Nast і Redfin, але сутыкнулася з тэхнічнымі цяжкасцямі, якія Microsoft, верагодна, пераадолела, адаптаваўшы канцэпцыю.

Сярод першых партнёраў NLWeb — Shopify, Tripadvisor, Snowflake і O’Reilly Media, што сведчыць пра ўніверсальнасць праекта для розных галін. Дакументацыя і інструменты даступныя на GitHub, праект падтрымлівае папулярныя ШІ-мадэлі і фарматы даных, такія як JSONL.