Microsoft паведаміла кліентам, што за імі шпіёнілі расійскія хакеры

У часе ўнутранага расследавання Microsoft вызначыла маштаб хакерскай атакі. У кампаніі адзначылі, што хакеры атакавалі таксама даследчыкаў у сферы кібербяспекі, якія вялі расследаванне інцыдэнту. Microsoft не патлумачыла, якую колькасць кліентаў закранула атака, а таксама які быў аб’ём выкрадзеных лістоў.

«На гэтым тыдні мы працягнулі адпраўляць апавяшчэнні кліентам, якія перапісваліся з супрацоўнікамі Microsoft, што выкарыстоўвалі карпаратыўныя ўліковыя запісы электроннай пошты і былі ўзламаныя зламыснікамі з Midnight Blizzard», — расказаў прадстаўнік Microsoft.

У атацы падазраюць хакерскую групоўку Midnight Blizzard, якая можа быць звязаная з расійскім урадам. Як паведамляецца, зламыснікі ў студзені атрымалі доступ да «невялікага адсотка» уліковых запісаў карпаратыўнай пошты. Пасля хакеры рабілі яшчэ некалькі спроб узлому.