Microsoft спрасціла доступ да воблачнага сэрвісу Azure OpenAI і хоча дадаць туды ChatGPT

Гендырэктар кампаніі Сацья Надэла заявіў, што ChatGPT неўзабаве стане даступны карыстальнікам звычайных сэрвісаў. Для атрымання доступу да Azure OpenAI кліент мае запоўніць анкету з апісаннем свайго прадукту і спосабу выкарыстання тэхналогій. У анкеце трэба расказаць, у якой сферы кампанія будзе ўжываць АІ, хто яе мэтавая аўдыторыя і канчатковыя карыстальнікі прадукту.

Microsoft можа адмовіць у доступе, калі палічыць, што прадукт і мэты апісаныя занадта размыта або сцісла, а таксама не адпавядаюць этычным прынцыпам кампаніі. Раней у лістападзе 2021 года Microsoft абвясціла аб інтэграцыі свайго воблака Azure з прадуктамі OpenAI. У кастрычніку ў падпіску Office была дададзеная праграма для графічных дызайнераў Designer — з інтэграцыяй з DALLE 2 ад OpenAI.