Microsoft звольніла праграмістаў за пратэст супраць дапамогі Ізраілю

Паводле дадзеных CNBC, Microsoft звольніла дзвюх супрацоўніц за пратэсты падчас святкавання 50-годдзя кампаніі. Ібтыхаль Абусад, інжынер-праграміст з AI-падраздзялення кампаніі, была звольненая 7 красавіка. Іншая супрацоўніца, Ванія Агравал, інжынер-праграміст Microsoft, заявіла пра намер звольніцца 11 красавіка, аднак Microsoft таксама скасавала з ёй працоўную дамову 7 красавіка.

Падчас выступлення кіраўніка Microsoft AI Мустафы Сулеймана, Абусад ускочыла і заявіла: «Мустафа, ганьба табе! Вы сцвярджаеце, што клапоціцеся пра выкарыстанне ШІ на карысць чалавецтву, але Microsoft прадае ШІ-зброю ізраільскай арміі. Пяцьдзясят тысяч чалавек загінулі, і Microsoft падтрымлівае гэты генацыд у нашым рэгіёне». Абусад таксама сказала, што Сулейман і кампанія «нажываюцца» на палестына-ізраільскім канфлікце.

У адказным унутраным паведамленні Microsoft адзначыла, што Абусад магла б канфідэнцыйна паведаміць пра сваю заклапочанасць свайму менеджару або ў аддзел па працоўных адносінах, але замест гэтага «мэтанакіравана сарвала выступленне» Сулеймана. Кампанія дадала, што «гэтае парушэнне было накіраванае на тое, каб набыць вядомасць і максімальна сарваць гэтую доўгачаканую падзею» і «неадкладнае спыненне вашай працоўнай дамовы з’яўляецца адзіна прымальным адказам».

На іншым мерапрыемстве Агравал перапыніла выступленне генеральнага дырэктара Microsoft Сацьі Надэлы з аналагічным пратэстам і таксама накіравала электронны ліст кіраўніцтву. У сваім лісце Агравал напісала, што за апошнія паўтара года ўсвядоміла ўзрастаючую ролю Microsoft у ваенна-прамысловым комплексе і лічыць кампанію «саўдзельніцай» як «вытворцу лічбавай зброі, якая падтрымлівае сачэнне, апартэід і генацыд».