Алеся Чапкевич bel 8 студзеня 2026, 19:10

Мінчанка аформіла два крэдыты і прадала за паўцаны чатыры айфоны, каб перавесці «міліцыі» 40K рублёў

48-гадовая жыхарка сталіцы перавяла махлярам буйную суму грошай. Гісторыя з’явілася ў Telegram-канале «Міліцыя Мінска».

Жанчыне ў месэнджары напісалі ад імя дырэктара яе арганізацыі і папрасілі дапамагчы міліцыі «у сувязі з інвентарызацыяй». Потым з ёй звязаўся фэйкавы праваахоўнік, які паведаміў, што махляры завалодалі яе асабістымі дадзенымі і аформілі на яе імя крэдыт. Каб пазбегнуць крымінальнай адказнасці і вобшуку ў кватэры, ёй сказалі ўзяць «люстраны крэдыт» на тую ж суму і перавесці грошы на спецыяльны рахунак.

Для пераканаўчасці жанчыне называлі рэальныя дадзеныя праваахоўнікаў, якія знаходзяцца ў адкрытым доступе. Яна праверыла інфармацыю на афіцыйных сайтах і аформіла 2 крэдыты, але патрэбную суму так і не атрымала. Тады «праваахоўнікі» пераканалі мінчанку аформіць растэрміноўкі на 4 айфоны і хутчэй прадаць іх за палову рынкавага кошту.

Атрыманыя 40 тысяч рублёў жанчына перавяла на рахункі, якія ёй далі аферысты. Узбуджана крымінальная справа за махлярства.

Міліцыя папярэджвае, што злачынцы пастаянна прыдумляюць усё новыя спосабы падману. А калі нехта патрабуе грошы ў перапісцы, заклікае звязвацца з суразмоўцам асабіста.