Мінск страціў 82 радкі ў топе гарадоў для стартапаў — у два разы больш, чым за мінулы год
У свежым рэйтынгу гарадоў свету з самымі спрыяльнымі ўмовамі для працы стартапаў Global Startup Ecosystem Index сталіца Беларусі апусцілася на 312 пазіцыю — мінус 82 ў параўнанні з 2021 годам. Гэта адзіны беларускі горад, які прадстаўлены ў спісе.
Сама Беларусь упала на 3 радкі — з 67-га на 70-ы, размясціўшыся паміж Паўночнай Македоніяй і невялікай афрыканскай дзяржавай Маўрыкій.
У рамках Усходняй Еўропы Беларусі захавала 18 месца, Мінск страціў 2 радкі і стаў 24-м.
Аўтары адзначаюць, што з пачатку публікацыі рэйтынга ў 2017-м і Мінск, і Беларусь з года ў год стабільна здаюць пазіцыі, а пра экасістэму пішуць, што яна мае вялікі, але нерэалізаваны патэнцыял.
«Беларусь была прыкладам краіны, якой пры адноснай ізаляцыі ўдаецца накладваць станоўчы адбітак на глабальную стартап-экасістэму дзякуючы выдатнай якасці мясцовых распрацоўшчыкаў, ІТ-спецыялістаў і разумным падыходам да развіцця экасістэмы. Але цяпер усё гэта ў мінулым», — пішуць складальнікі рэйтынга.
Паводле іх слоў, палітычная нестабільнасць і паглыбленне міжнароднай ізаляцыі за апошнія гады ствараюць надзвычай складаныя ўмовы для прадпрымальніцтва: «У выніку цяпер у Беларусі велізарная бездань паміж яе сапраўдным патэнцыялам і бягучым станам рэчаў, які пагаршаецца ад’ездам найбольш таленавітых айцішнікаў у краіны Еўропы, дзе іх чакаюць з распасцёртымі рукамі».
На думку каманды StartupBlink, Беларусі будзе няпроста гадаваць сваю стартап-экасістэму. Перш за ўсё, для гэтага ёй спатрэбіцца вярнуць давер і грошы інвестараў, «што малаверагодна пры цяперашніх абставінах», а таксама пераканаць фаўндараў, што размяшчаць тут свае кампаніі і разглядаць краіну як патэнцыйны рынак — можна. Але для гэтага патрэбныя новыя палітыкі ў дачыненні да стартапаў, якія будуць гэтаму спрыяць.
Читать на dev.by