МТС запусціў сваю краму праграм у Расіі

Цяпер у AppBazar даступныя 83 праграмы, 55 з якіх — гульні. Купляць платныя праграмы можна з рахунку мабільнага тэлефона або з карт расійскіх банкаў. Кампанія плануе прасоўваць праграмы з AppBazar ў рамках праграмы лаяльнасці сярод сваіх кліентаў і да лютага 2023 года абяцае пашырыць каталог да 500 пазіцый. Таксама МТС вядзе перамовы з вытворцамі смартфонаў наконт перадусталёўкі AppBazar, але не раскрывае, з кім менавіта.

Размяшчаць праграмы ў AppBazar змогуць як расійскія, так і замежныя распрацоўшчыкі. У МТС кажуць, што ўжо супрацоўнічаюць з пяццю замежнымі кампаніямі, але не ўдакладняюць, з якімі. Гэта галоўнае адрозненне AppBazar ад маркетплэйса RuStore ад VK, які будзе перадусталёўвацца на ўсе мабільныя прылады, якія прадаюцца ў Расіі: там выдаўцамі могуць быць толькі расійскія асобы.

У краме МТС ужо ёсць прадукты замежных распрацоўшчыкаў, напрыклад, гульні ад брытанскай 8floor, італьянскай TuoMuseo, бразільскай Orube Game Studio, партугальскай Infinity Games і расійска-брытанскай Zeptolab.

З 28 негульнявых праграм у AppBazar 15 — распрацоўкі самой МТС. Некаторыя іншыя сэрвісы таксама звязаныя з аператарам: маркетплэйс Ozon — агульным уладальнікам, каршэрынг BelkaCar — прысутнасцю ў прэміяльнай падпісцы.

Гэтая крама — чацвёртая спроба МТС: тры папярэднія праекты, у тым ліку ў супрацоўніцтве з Vodafone і Opera, былі закрытыя. У цэлым эксперты сумняваюцца ў патэнцыяле крам праграм, запушчаных аператарамі сувязі, паколькі яны проста капіруюць ужо прысутныя на рынку праекты.