Музычныя лэйблы не змаглі забараніць Anthropic навучаць ШІ на тэкстах песень

У кастрычніку 2023 года Concord Records, ABKCO Music & Records і Universal Music падалі пазоў супраць Anthropic. Пазоўнікі сцвярджалі, што кампанія выкарыстоўвае матэрыялы, абароненыя аўтарскім правам, для навучання свайго чат-бота Claude. Паводле іх слоў, у выніку Claude выдае амаль ідэнтычныя копіі тэкстаў песень у адказ на запыты карыстальнікаў.

Праваўладальнікі заявілі, што Anthropic парушыла аўтарскія правы як мінімум на 500 песень такіх выканаўцаў, як Беёнсэ, The Rolling Stones і The Beach Boys. Яны запатрабавалі папярэднюю судовую забарону, каб перашкодзіць кампаніі выкарыстоўваць гэтыя творы для далейшага навучання штучнага інтэлекту. Аднак суд у Каліфорніі адхіліў гэтае хадайніцтва.

Суддзя Юмі Лі заявіла, што запыт выдаўцоў быў занадта шырокім і што яны не змаглі прадэманстраваць, якім чынам дзеянні Anthropic нанеслі ім «непапраўную шкоду». Яна таксама адзначыла, што праваўладальнікі фактычна просяць суд вызначыць межы ліцэнзійнага рынку для навучання ШІ, у той час як ключавое пытанне добрасумленнага выкарыстання застаецца неўрэгуляваным.

У пачатку 2025 года Anthropic ужо дасягнула пагаднення з лэйбламі па ўрэгуляванні часткі пазову. У прыватнасці, згодна з гэтым пагадненнем, Claude не будзе паказваць карыстальнікам тэксты песень, што належаць гэтым выдаўцам, або ствараць новыя тэксты на аснове абароненых аўтарскім правам матэрыялаў.