«Мы знайшлі золата»: распрацоўка Sid Meier's Civilization VII завершаная, гульня неўзабаве выйдзе

«Азалачэнне» гульні, то-бок пераход у фінальную стадыю распрацоўкі, азначае, што майстар-дыск з рэлізнай версіяй адпраўляецца ў друк і на загрузку ў лічбавыя сэрвісы. Распрацоўшчыкі ўпэўненыя, што выхад гульні 11 лютага адбудзецца ў тэрмін.

Civilization VII прапануе «новыя магчымасці ў гульнявым працэсе», уключаючы перапрацаваную сістэму бою і адсутнасць прывязкі гістарычных лідараў да канкрэтных нацыяй. Гэта дазволіць гульцам выбіраць лідараў для кожнай эпохі развіцця сваёй дзяржавы, пры гэтым кожная з трох эпох (антычнасць, эпоха адкрыццяў і сучаснасць) прапануе свой набор цывілізацый.

Гульцы змогуць прытрымлівацца гістарычнага шляху развіцця або стварыць уласную ўнікальную гісторыю. У гульні будуць даступныя як адзіночныя, так і шматкарыстальніцкія рэжымы з магчымасцю кросплэю паміж ПК і кансолямі.

Гульня будзе даступная на розных платформах, уключаючы PC, Nintendo Switch, PlayStation і Xbox. Акрамя таго, перад выпускам гульцам былі прапанаваныя розныя спецыяльныя выданні для папярэдняга заказу, такія як Standard, Deluxe, Founders і Collector’s Edition.