На Тайване пачаўся бэбі-бум сярод айцішнікаў
Па ўсім Тайвані нараджальнасць падае да рэкордных мінімумаў, але ў мясцовай «Крамянёвай даліне» усё наадварот. У Навуковым парку Хсіньчу, дзе базуюцца TSMC, MediaTek і сотні іншых тэхнакампаній, наспявае лакальны ўсплёск нараджальнасці, распавядае Rest of World.
У маштабах краіны сітуацыя трывожная. У сярэднім на жанчыну тут прыходзіцца менш за адно дзіця, а школы зачыняюцца з-за нястачы вучняў. Але ў Хсіньчу дзіцячых садкоў і школ не хапае, у цэнтры для маці выстройваюцца чэргі, а горад расце за кошт інжынераў і айцішнікаў, якія прыязджаюць сюды працаваць.
Навукоўцы назвалі гэта «эфектам Хсіньчу». У парк прыязджаюць маладыя, адукаваныя і заможныя спецыялісты. Яны ў тым узросце, калі людзі ствараюць сем'і, і пры стабільных даходах гатовыя да дзяцей.
Яшчэ ў 2023 годзе ў парку працавала больш за 177 тысяч чалавек. TSMC нават хвалілася, што яе супрацоўнікі забяспечылі 1,8% усіх нованароджаных на Тайвані за год. Для школ і садкоў гэта сапраўдны выклік — ім даводзіцца адкрываць новыя класы і пашыраць інфраструктуру.
Свой унёсак робіць клопат кампаній, якія імкнуцца зрабіць усё, каб супрацоўнікам было прасцей сумяшчаць працу і сям’ю. У TSMC і MediaTek ёсць уласныя дзіцячыя садкі проста на тэрыторыі кампусаў. Novatek выплачвае штомесячныя дапамогі на дзяцей да 6 гадоў. Таксама значна зніжае нагрузку гнуткі графік ці аддаленая праца для бацькоў з малымі дзецьмі.
Яшчэ адзін фактар — заробкі. Сярэдні айцішнік у Хсіньчу атрымлівае каля $56 тысяч у год, што ўтрая вышэй за сярэдні па Тайвані. У топавых інжынераў TSMC заробкі могуць перавальваць за $166 тысяч. Дзякуючы гэтаму некаторыя сем'і могуць дазволіць сабе, каб працаваў толькі адзін чалавек, а другі займаўся дзецьмі.
Хсіньчу ў выніку стаў унікальнай кропкай на карце Тайваня. Гэта адзіны рэгіён, дзе дзяцей да 14 гадоў больш, чым сталых людзей.
Читать на dev.by