Ці ўлічылі страхоўку ад кампаніі? Падатковая патлумачыла, як лічыць даход у мэтах «звышпадатку»

31 сакавіка заканчваецца тэрмін падачы падатковых дэкларацый за 2024 год. Напярэдадні дэдлайну падатковая выпусціла цэлыя тры тлумачэнні пра нюансы падліку падатковай базы для тых, хто падпадае пад павышаную стаўку падаходнага падатку — 25%.

Нагадаем, па такой стаўцы плацяць тыя, хто зарабіў (па працоўных дамовах, дамовах ГПХ і ў выглядзе дывідэндаў) у 2024 годзе звыш 200 тыс. BYN (220 тыс. BYN — у 2025 годзе) — у частцы перавышэння даходу над гэтай планкай.

Страхавыя ўзносы і прэміі

Відаць, нейкія наймальнікі спыталі МПЗ, ці ўключаць у сукупны даход фізічных асоб страхавыя ўзносы добраахвотнага страхавання, а таксама страхавыя выплаты (прэміі), атрыманыя работнікамі пры надыходзе страхавога выпадку.

Кароткі адказ такі: страхавыя прэміі ўключаць не трэба незалежна ад таго, хто плаціў узнос, а вось сам страхавы ўзнос, калі яго за работніка заплаціў наймальнік — так, уключаць трэба.

Тлумачэнне: прадметам дамовы асабістага страхавання з’яўляецца не выкананне работ / аказанне паслуг, а страхавая абарона маёмасных інтарэсаў. Аднак карпаратыўнае страхаванне належыць да сферы працоўных адносін, таму даход у выглядзе аплаты наймальнікам страхавых паслуг трэба ўлічваць пры вылічэнні падатку.

У той жа час, калі работнік сам заплаціў страхавы ўзнос і потым атрымаў яго назад пры скасаванні страхавой дамовы, у даход гэтая сума не ўключаецца.

Бонусы

Яшчэ адное пытанне да падаткавікоў, верагодна, датычылася бонусаў — але не ўсіх запар, а выплачваных сябрам выканаўчага органу гаспадарчага таварыства. 

Тут расклад такі: узнагароджанне як сябрам калегіяльнага выканаўчага органа (праўлення, дырэкцыі), так і дырэктару (гендырэктару) за выкананне сваіх абавязкаў у выканаўчым органе гаспадарчага таварыства ўключаецца ў даход у мэтах падатку на звышпрыбыткі.

А вось узнагароджанне сябрам рады дырэктараў (назіральнай рады) не ўключаецца, так як яны дзейнічаюць на аснове статута і рашэнняў удзельнікаў таварыстваў, а не на падставе працоўных/грамадзянска-прававых дамоў.

Дывідэнды (вельмі спецыфічнае)

Пытанне тычылася, відаць, вельмі прыватнага выпадку: ці можна памяншаць падатковую базу падаходнага падатку «на суму дывідэндаў, атрыманых беларускай арганізацыяй, якая налічыла дывідэнды, ад іншай арганізацыі, заснавальнікам (удзельнікам) якой з’яўляецца такая арганізацыя — атрымальнік дывідэндаў».

Дамо зацікаўленым самім паглыбіцца ў аргументы падатковай.

Кароткі адказ: не.

Багатым айцішнікам хвалявацца?

Калі ваша кампанія ў ПВТ, то не.

Яшчэ пры канцы 2023 года МПЗ патлумачыла, што падатак на звышпрыбытак не будзе распаўсюджвацца на заробкі супрацоўнікаў кампаній-рэзідэнтаў ПВТ.

Матывіроўка была такая: маўляў, пад дзеянне нормы аб звышдаходах падпадаюць толькі даходы, што абкладаюцца па стаўцы (13%), прапісанай у п. 1 арт. 214 GК. Для рэзідэнтаў ПВТ жа стаўка ў 13% была вызначаная іншымі нарматыўнымі актамі (у дэкрэце № 8 прапісалі стаўку 9%, а з дапамогай паправак у GК яе часова давялі да 13%). Таму пад артыкул пра звышдаходы і павышаную стаўку супрацоўнікі кампаній-рэзідэнтаў не падпадаюць.

Апошні раз стаўку 13% для рэзідэнтаў ПВТ працягнулі да 1 студзеня 2028 года. Дакумент з гэтай нормай называецца закон «Пра змяненне законаў». Па вышэй пададзенай логіцы, падатак на багацце супрацоўнікам кампаній-рэзідэнтаў усё яшчэ не пагражае.