У вас засталося ІП у Беларусі? Пара плаціць у ФСАН і/або запаўняць ПУ-3

Тэрмін выплаты ўнёскаў у Фонд сацыяльнай абароны насельніцтва індывідуальнымі прадпрымальнікамі заканчваецца 1 сакавіка 2025 года. Плаціць самастойныя ўнёскі цяпер мусяць нават тыя ІП, якія паралельна працуюць паводле працоўнай дамовы (да 1 студзеня 2023 года яны былі вызваленыя ад такога абавязку).

Колькі плаціць

Мінімальны страхавы ўнёсак складае 35% ад 12-месячнай мінімальнай зарплаты. У 2024 годзе мінімальная зп была роўная 626 BYN, таму памер унёску за гэты перыяд — 2629,20 BYN (626 BYN x 12 BYN x 35%).

Хто не плаціць

Тыя, у каго ІП бяздзейнічала ўвесь год або часткова, не плацяць унёскаў за перыяды прастою. Аднак важна своечасова запоўніць і падаць у ФСАН форму ПУ-3 (форму персаніфікаванага ўліку). Гэта трэба зрабіць да 31 сакавіка 2025 года.

Што калі не даць справаздачы

Пратэрміноўка гэтага дэдлайну больш чым на тры працоўныя дні пагражае адміністрацыйнай справай і штрафам да 20 базавых велічынь (42 BYN x 20 = 840 BYN). Гэта нават больш, чым мінімальны гадавы ўнёсак.

Як даць справаздачу

ПУ-3 можна падаць на карпаратыўным партале ФСАН у выглядзе электроннага дакумента, заверанага ЭЦП. Калі ЭЦП няма, для электроннай адпраўкі дакумента спатрэбіцца ўліковы запіс карыстальніка. Каб зрабіць уліковы запіс, трэба асабіста прыйсці ў ФСАН з пашпартам і падаць заяву.

У чым праблема

Летась чытачы dev.by, нават тыя, хто мае ЭЦП, сутыкнуліся са складанасцямі пры адпраўцы ПУ-3: сэрвіс не працуе або дрэнна працуе з-за мяжы. Аднак у рэшце рэшт аднаму з іх удалося даць справаздачу з-за мяжы, і ён падзяліўся інструкцыяй.

Wanted. Калі вы ўжо спрабавалі падаць ПУ-3 з-за мяжы сёлета і вам усё ўдалося / вы выявілі непераадольныя перашкоды, напішыце нам у @devby_insight_bot, гэта ананімна.