У NASA нарэшце ўзламалі кантэйнер з грунтам астэроіда Бену праз 4 месяцы

Капсула з грунтам прызямлілася ў штаце Юта яшчэ 24 верасня мінулага года. Кантэйнер немагчыма было ўзламаць адразу — перашкаджалі два пераклінаваныя балты з 35, што ўтрымлівалі вечка. Таксама ўзламаць яго неабходна ў стэрыльным боксе, каб узоры з космасу не былі забруджаныя зямнымі мікраарганізмамі і рэчывамі.

Спецыялісты NASA распрацавалі спецыяльны інструмент, які пасля выпрабаванняў змясцілі ў пальчаткавы бокс. Пад вечкам, якое абараняла кантэйнер, навукоўцы выявілі каля 70 грамаў астэроіднага рэчыва. Але больш за ўсё матэрыялу знаходзіцца ў самым кантэйнеры заборнага модуля TAGSAM.

Для ўзлому самой капсулы неабходна стварыць у боксе асаблівыя ўмовы. Калі гэта адбудзецца, матэрыял перададуць для вывучэння ў вядучыя лабараторыі свету.