Назад да тэлефонаў і факсаў: глабальны збой у Microsoft паралізаваў банкі, інвестфірмы і авіякампаніі

З перабоямі ў працы электроннай пошты сутыкнуліся Barclays, Deutsche Bank, ING, Nasdaq і Euronext. Некаторыя сінгапурскія і тайванскія банкі не маглі завяршыць угоды, а японскім давялося выкарыстоўваць факсы для пацверджання гандлёвых аперацый.

Паводле удзельнікаў рынку, з якімі размаўляў Bloomberg, збой у першую чаргу закрануў апрацоўку і пацверджанне ўгодаў. Праз непаладкі ў Outlook аперацыі, на якія раней сыходзілі «секунды», цяпер патрабуюць тэлефонных званкоў і дадатковага часу. Гэта можа негатыўна адбіцца на ліквіднасці фінансавых рынкаў, бо фінансавыя арганізацыі менш ахвотна праводзяць угоды без аўтаматызаваных сістэм апрацоўкі.

Акрамя таго, збой закрануў індыйскія авіякампаніі IndiGo, Akasa Air і Air India — яны папярэдзілі пасажыраў пра праблемы ў працы службаў падтрымкі. У Японіі лагістычная кампанія Sagawa Express спыніла апрацоўку онлайн-браніраванняў, а фармацэўтычная Taisho пачала прымаць заказы праз тэлефон.

Непаладкі закранулі дацкую судаходную кампанію Maersk. У Вялікабрытаніі з тэхнічнымі праблемамі сутыкнуліся лонданская паліцыя, Нацыянальная служба аховы здароўя, чыгуначны аператар National Rail і страхавая кампанія Aviva.

Microsoft дасюль спрабуе разабрацца са збоем, які працягваецца ўжо амаль суткі. Паводле кампаніі, справа не ў кібератацы — прычынай назвалі павышаную нагрузку на інфраструктуру ў некаторых рэгіёнах. Microsoft заяўляла, што часткова аднавіла працу сервісаў, аднак цалкам ліквідаваць непаладкі пакуль не ўдалося.

Глабальны збой у Microsoft: пошта Outlook і сэрвісы 365 «ляжаць» ужо паўдня — пацярпелі дзяржорганы розных краін, OpenAI і Anthropic

Па тэме

Глабальны збой у Microsoft: пошта Outlook і сервісы 365 «ляжаць» ужо паўдня — пацярпелі дзяржорганы розных краінаў, OpenAI і Anthropic