«Няма месца для ШІ-інавацый»: з Еўропы сыходзіць адзін з найбуйнейшых стартапаў. Але Еўропа збіраецца будаваць гігафабрыкі, каб прыцягнуць ШІ-кампаніі
Нідэрландскі распрацоўшчык ПЗ у сферы воблачных камунікацый Bird вырашыў вынесці большую частку бізнесу з Еўропы, піша Reuters. Прычынай стала неспрыяльная прававая база і складанасці з наймам высокакваліфікаваных ІТ-спецыялістаў.
«Мы сыходзім з Еўропы ў першую чаргу таму, што тут няма ўмоў, неабходных нам для стварэння інавацый у эпоху ШІ-тэхналогій», — сказаў выданню генеральны дырэктар Bird Роберт Віс. Ён лічыць, што зарэгуляванасць галіны ў Еўропе будзе тармазіць інавацыі, у той час як астатні свет імкліва рухаецца насустрач ШІ.
Стартап засяродзіць дзейнасць у Нью-Ёрку, Сінгапуры і Дубаі. У ЕС застанецца толькі офіс у Літве, і яшчэ нейкі час Bird працягне плаціць падаткі ў Нідэрландах.
Bird — адзін з самых вядомых тэхналагічных стартапаў Нідэрландаў. Ён быў заснаваны ў 2011 годзе і з’яўляецца прамым канкурэнтам амерыканскага пастаўшчыка воблачных камунікацыйных платформаў Twilio. Bird распрацоўвае карпаратыўны ШІ-сэрвіс для аўтаматызацыі і спрашчэння бізнес-працэсаў. Яго продажы за 2023 год склалі €555 млн, прыбытак — €17 млн.
Год таму ў ЕС быў прыняты першы ў свеце закон аб ШІ. У ЗША заявілі, што ён можа стрымаць развіццё тэхналогіі. Пра гэта ж казаў у лютым генеральны дырэктар OpenAI Сэм Альтман. У Еўропе, здаецца, пачулі папярэджанне і паабяцалі аслабіць рэгуляванне.
Тым часам Еўракамісія шукае $20 млрд на будаўніцтва чатырох «ШІ-гігафабрык» — буйных дата-цэнтраў, якія павінны дапамагчы Еўропе дагнаць ЗША і Кітай у сферы ШІ. Але эксперты ў галіне сумняваюцца ў мэтазгоднасці гэтай ідэі.
Читать на dev.by