Ноўтбукі «Гарызонт» працуюць на чыпах Intel. Даведаліся, што пра гэта думае Intel

dev.by накіраваў у прэс-службу Intel пытанні: 

• Ці паінфармаваныя ў Intel пра факт выкарыстання працэсараў Intel у ноўтбуках вытворчасці беларускага дзяржаўнага прадпрыемства Horizont Group?
• Як працэсары Intel трапляюць у Беларусь, нягледзячы на анансаваную забарону на ўсе пастаўкі? 
• Якія захады гатовыя зрабіць у Intel, калі высветліцца, што працэсары пастаўляюцца ў Беларусь у абыход санкцый? 

У Intel не сталі адказваць на пастаўленыя пытанні, але даслалі агульны каментар — паведамілі, што ўважліва сочаць за ўсімі санкцыямі ў дачыненні да Беларусі і не парушаюць іх:  

У Intel не ўдакладнілі, як працэсары трапляюць у Беларусь, нягледзячы на анансаваную забарону паставак. 

Яшчэ ў лютым мінулага года крыніцы РБК паведамлялі, што пастаўкі працэсараў AMD і Intel у Расію спыненыя. Тады прадстаўнікі Intel таксама сышлі ад прамога адказу на пытанне аб прыпыненні паставак: «Кампанія ўважліва сочыць за сітуацыяй і забяспечвае датрыманне дастасавальных санкцый і правілаў экспартнага кантролю, уключна з новымі санкцыямі, уведзенымі OFAC, і правіламі, выдадзенымі BIS (бюро індустрыі і бяспекі пры Міністэрстве гандлю ЗША)».

Хроніка з’яўлення беларускіх ноўтбукаў

• 1 верасня 2022 года Аляксандр Лукашэнка прадэманстраваў школьнікам «першы беларускі камп’ютар», які яму падарылі «разумныя людзі». Паводле слоў Лукашэнкі, у камп’ютары было «каля 12% беларускага, але пры канцы года будзе 30%». Пасля такой прэзентацыі навіны пра беларускі ноўтбук пачалі рэгулярна з’яўляцца ў дзяржаўных СМІ.
• У кастрычніку гендырэктар холдынга «Гарызонт» Юрый Прадко ў эфіры СТБ расказаў пра пачатак серыйнай вытворчасці ноўтбукаў: «Больш за 80 мадэляў мы гатовыя даць рынку. Серыйная і масавая вытворчасць пачнецца ў лістападзе». 
• У снежні намесніца старшыні Мінгарвыканкама Надзея Лазарэвіч падзялілася напалеонаўскімі планамі: «Ноўтбукі як вырабляліся, так і вырабляюцца. Чатыры тысячы выпушчана сёлета, і ўжо агучаныя планы налета — да 200 тысяч».
• Лазарэвіч сказала гэта ў каментарах расійскаму выданню Sputnik.by. Многія расійскія выданні — у тым ліку тэхнічныя — перадрукавалі навіну пра беларускія ноўтбукі. Падобна, што гэта была піяр-кампанія па прасоўванні ноўтбукаў «Гарызонт» на расійскім рынку. Пра гэта сведчаць шматлікія хвалебныя загалоўкі ў навінах: «Знакамітыя беларускія ноўтбукі Horizont прывязуць у Расію. Братэрскае імпартазамяшчэнне», «Вытворца беларускіх ноўтбукаў мае намер скласці канкурэнцыю Apple і яе MacBook», «„Такога яшчэ не вырабляюць“: Беларускія ноўтбукі „Гарызонт“ пачнуць пастаўляць у Расію», «Вытворца беларускага ноўтбука расказаў пра канкурэнцыю з MacBook».
• На Ozon з’явіўся тэг «Ноўтбук Гарызонт», але для продажу на платформе дэвайс усё яшчэ недаступны.   
• Продажы ноўтбукаў «Гарызонт» у Беларусі пачаліся пры канцы снежня. Дзяржаўнае агенцтва БЕЛТА паведаміла пра «ўрачыстую цырымонію старту продажаў беларускай навінкі ў святочнай атмасферы» ў ГЦ Galleria Minsk.
• Затым ноўтбук стаў даступны для куплі ў адной-адзінюткай інтэрнэт-краме amd.by. Гэтая крама трапіла ў навіны пры канцы 2021 года, калі нечакана закрылася — з усяго відаць, для пазапланавай дзяржправеркі. 

Цяпер у amd.by даступная для куплі адная мадэль — Horizont H-book 15 МАК4. Гэта найтаннейшая мадэль з мінімальнай камплектацыяй: працэсар Intel Core i3, 8 Гб аперацыйнай памяці, 256 Гб SSD. Каштуе ноўтбук 1599 рублёў. 

У каталогу на сайце анлайн-крамы «Гарызонт» (працуе на расійскім рынку) ёсць і іншыя, магутнейшыя, мадэлі — з працэсарамі Intel Core i5 і Intel Core i7. Яны маюць паступіць у продаж на працягу студзеня.

Нужна помощь. Засаппорть dev.by!

По теме

Нужна помощь. Засаппорть dev.by!

Беларускія для войска, топавыя для журналістаў. Якія ноўтбукі купляюць дзяржорганы

Па тэме

Беларускія для войска, топавыя для журналістаў. Якія ноўтбукі купляюць дзяржорганы

Как технологические санкции Запада изменят Беларусь

По теме

Как технологические санкции Запада изменят Беларусь