Новая функцыя YouTube дазваляе дзяліцца відэа без рэкламы

Для ўдзельнікаў эксперыменту стала даступнай новая опцыя пры націску на кнопку «Падзяліцца» пад відэа — «Падзяліцца без рэкламы». Кожны месяц Premium-карыстальнікі могуць згенераваць да 10 такіх спасылак. Кожная створаная спасылка дазваляе прагледзець відэа без рэкламы да 10 разоў.

Калі такой спасылкай выпадкова падзеляцца з карыстальнікам, у якога ўжо ёсць падпіска Premium, прагляд не будзе залічаны ў ліміт бясплатных праглядаў. Таксама не мае значэння, якой колькасці людзей карыстальнік адправіць спасылку, бо агульная колькасць праглядаў без рэкламы размяркоўваецца паміж усімі атрымальнікамі.

Дзеянне згенераванай спасылкі на прагляд без рэкламы абмежаванае. Кожнае відэа, якім падзяліліся без рэкламы, можа быць прагледжана да 10 разоў або на працягу 30 дзён з моманту стварэння унікальнай спасылкі — у залежнасці ад таго, што наступіць раней. Пасля сканчэння гэтага тэрміну або вычарпання ліміту праглядаў відэа зноў будзе прайгравацца з рэкламай.

Падзяліцца без рэкламы можна амаль любым кантэнтам на YouTube, за выключэннем музычных відэа, кантэнту YouTube Originals, Shorts, прамых трансляцый, а таксама фільмаў і шоу. Зараз Google тэстуе функцыю ў абмежаваным рэжыме ў Аргенціне, Бразіліі, Канадзе, Мексіцы, Турцыі і Вялікабрытаніі.