Безас узначаліў новы ШІ-стартап, які сабраў ужо $6,2 млрд

Паводле выдання, Безас з’яўляецца адным з ключавых інвестараў кампаніі. Другім генеральным дырэктарам выступае Вік Баджадж — фізік і хімік, які раней працаваў у Google X разам з Сяргеем Брынам, удзельнічаў у запуску Verily і кіраваў Foresite Labs. Крыніцы паведамляюць, Баджадж пакінуў Foresite менавіта дзеля стварэння Prometheus.

Project Prometheus распрацоўвае ШІ для інжынерыі і вытворчых галін: камп’ютараў, аўтамабіляў, аэракасмічнай тэхнікі. Кампанія пазіцыянуе сябе як распрацоўшчыка «ШІ для фізічнай эканомікі» і імкнецца ствараць мадэлі, якія навучаюцца не толькі на тэкстах, але і на рэальных фізічных дадзеных, сімуляцыях і навуковых эксперыментах.

Гэты накірунак хутка расце: аналагічным падыходам займаюцца Periodic Labs і Thinking Machines Lab, заснаваныя выхадцамі з OpenAI і DeepMind.

Стартап ужо наняў каля 100 супрацоўнікаў, уключаючы даследчыкаў з найбуйнейшых ШІ-лабараторый. Запуск Prometheus размяшчае Безаса ў цэнтры новай гонкі тэхналогій: кампанія будзе канкураваць з Google, Meta, Microsoft, OpenAI і Anthropic — асабліва ў сегменце ШІ-сістэм, якія паскараюць навуковыя і інжынерныя распрацоўкі.

Праект таксама перасякаецца з даўнімі інтарэсамі Безаса ў касмічнай галіне: Prometheus мае намер ствараць ШІ, які будзе прымяняцца ў распрацоўцы і вытворчасці аэракасмічных сістэм. Месцазнаходжанне штаб-кватэры кампаніі пакуль не раскрываецца.