ААЭ запускаюць новыя візы для айцішнікаў

Пра гэта паведаміла Федэральнае ўпраўленне па пытаннях ідэнтычнасці, грамадзянства, мытні і партовай бяспекі (ICP). Згодна з правіламі, новая віза можа быць аформлена як для разавай, так і для шматразовай паездкі. Асноўная ўмова — наяўнасць ліста ад прымаючай кампаніі або арганізацыі, якая працуе ў сферы тэхналогій.

Па словах кіраўніка ICP генерал-маёра Сухайля Саіда аль-Хайлі, рэформа адлюстроўвае «глабальныя трэнды і доўгатэрміновыя прыярытэты ААЭ» у сферы тэхналогій, прадпрымальніцтва і міжнароднага супрацоўніцтва. Абнаўленні павінны павысіць прывабнасць краіны для ІТ-прафесіяналаў і ўмацаваць яе пазіцыі.

Асобна будзе выдавацца віза для мерапрыемстваў (event visa), якая дазваляе замежнікам наведваць фестывалі, канферэнцыі, выставы і іншыя грамадскія падзеі. Яшчэ адна новая катэгорыя — турыстычная шматразовая віза для пасажыраў круізных лайнераў і прагулачных суднаў, якая афармляецца на падставе турыстычнага маршруту і праз ліцэнзаваныя кампаніі.

Новыя правілы закранулі візы для кіроўцаў грузавікоў: цяпер іх змогуць выдаваць пры ўмове наяўнасці страхоўкі і гарантый з боку транспартных кампаній. Абнавіліся і ўмовы віз для наведвання сяброў і сваякоў: мінімальны даход гаранта залежыць ад ступені сваяцтва і вар'іруецца ад 4 000 да 15 000 дырхамаў (ад $1000 да $4000). Да гэтага часу грамадзяне большасці дзяржаў могуць знаходзіцца на тэрыторыі краіны без візы ад 30 да 90 дзён.