EPAM, Lesta і іншыя наймаюць джуноў у красавіку. Ёсць вакансіі на $1000 са старту

Аўтсорс

EPAM з пачатку года крыху знізіў актыўнасць у пошуку новых супрацоўнікаў у беларускую каманду. На сайце EPAM адкрыта больш за 20 вакансій (у снежні іх было ўдвая больш).

Для джуноў прапаноў амаль няма. З усяго спісу вакансій — толькі прапанова для Junior Data Scientist (для аптымізацыі працэсаў і паляпшэння кліенцкіх рашэнняў). Таксама кампанія шукае Junior Financial Analyst.

А вось Innowise Group, наадварот, за апошнія два месяцы на траціну павялічыў колькасць вакансій у Беларусі. Цяпер адкрыта больш за 90 пазіцый, з іх чвэрць — для джуноў і спецыялістаў без досведу (стажыроўкі).

Так, у рэгіянальную каманду (Віцебск, Гомель, Магілёў) патрэбны Junior/Middle Data Engineer з досведам 1–3 гады. Кампанія прапануе шырокі спектр разнапланавых праектаў у такіх сферах, як FinTech, Medicine, Entertainment, eCommerce, Gaming, Artificial Intelligence і інш.

Таксама шмат прапаноў на праходжанне стажыроўкі.

У прыватнасці, праграмы стажыроўкі адкрыты для распрацоўшчыкаў (Python, .Net, Flutter, Angular). У залежнасці ад спецыялізацыі стажоры ў межах праграмы будуць распрацоўваць ПЗ, праектаваць і распрацоўваць маштабавальныя аплікацыі, web-аплікацыі з выкарыстаннем Python або .Net.

Таксама ёсць стажыроўкі для QA, SAP Consultant, Data Engineer/Data Analyst (для спецыялістаў з досведам 1–3 гады).

Больш вакансій, у тым ліку для джуноў, з’явілася і ў «Сістэмных тэхналогій».

У буйны праект для некалькіх замоўцаў у фінансавай сферы шукаюць бізнес-аналітыка без досведу працы. Таксама патрэбны бізнес-аналітык з досведам ад года для працы над праектамі ў сферы у FinTech. У ліку патрабаванняў — праца ў банкаўскай сферы.

Яшчэ ёсць вакансіі для Junior QA Engineer (тэставанне desktop-аплікацый) і Junior Full-stack (JS+ASP.NET) Developer (праект — інтэрнэт-банкінг для буйнога банка Беларусі).

Itransition таксама шукае джуноў, але іншай спецыялізацыі. У прыватнасці, кампанія шукае Project Manager Junior з досведам ад года і Junior+ IT Recruiter. У ліку патрабаванняў — выдатнае веданне ІТ-рынку, узровень англійскай — upper-intermediate.

Працягвае пашыраць штат праз шматлікія стажыроўкі для спецыялістаў без досведу кампанія Andersen. За апошні месяц яна размясціла больш за 40 такіх прапаноў.

Стажорам асобных адукацыйных праграм (Project Manager, General Manager) кампанія гатова плаціць стыпендыю 1 тыс. рублёў брута. Andersen абяцае працаўладкаванне пасля паспяховага навучання.

Аналагічнай стратэгіі прытрымліваецца і Aston. За апошні месяц яна размясціла 12 вакансій. Усе — для стажораў і жадаючых прайсці бясплатнае навучанне.

Прапановы на стажыроўку/навучанне адкрыты для аналітыкаў, інжынераў, менеджараў у ІТ-сферы, менеджара праектаў.

Амаль па ўсіх прапановах кампанія апісала фінансавыя ўмовы.

Так, менеджар у ІТ сферы падчас праходжання стажыроўкі (6 месяцаў) можа прэтэндаваць на стыпендыю да 1,4 тыс. рублёў грос. Пасля паспяховага заканчэння стажыроўкі гатовы на пачатковым этапе плаціць 2,1 тыс. рублёў грос «з рэгулярнымі пераглядамі ў бок павелічэння».

У менеджара праектаў фінансавыя ўмовы больш сціплыя. Падчас праходжання стажыроўкі (3 месяцы) можна разлічваць на стыпендыю 1 тыс. рублёў грос. Пасля паспяховага заканчэння стажыроўкі зарплата на пачатковым этапе складае 1,2 тыс. грос.

Найлепшыя фінансавыя ўмовы Aston прапануе Data Engineer і Data Analyst. Пасля паспяховага заканчэння стажыроўкі зарплата на пачатковым этапе складзе тысячу даляраў.

Прадукт

Lesta Games працягвае пашыраць штат мінскага офіса. За апошні месяц з’явілася каля 50 новых вакансій. Але для джуноў прапаноў няшмат.

Так, кампанія шукае Junior Business Analyst у каманду фінансавага аддзела, якая займаецца падтрымкай і дапрацоўкай унутранай сістэмы. Сярод патрабаванняў — досвед працы 6 месяцаў — 1 год у бізнес-аналізе, скончаная вышэйшая эканамічная або бухгалтарская адукацыя.

У праект Tanks Blitz Lesta патрэбны Deep Learning Engineer, які будзе даследаваць, навучаць і ўкараняць нейрасеткі ў працэс распрацоўкі гульні. Таксама кампаніі патрэбны Game Designer (Balance) у праект «Мир танков».

Геймдэв-студыя Awem Games за апошні месяц размясціла толькі тры вакансіі. Адна з прапаноў — для Junior Game Designer, «які марыць ствараць гульні, умее мысліць крэатыўна і гатовы прыдумваць арыгінальныя гульнявыя канцэпцыі».

У міжнароднага распрацоўшчыка мабільных гульняў у жанры Lifestyle Swag Masha таксама ёсць прапановы для джуноў. У каманду, у прыватнасці, патрэбны Junior+ QA Engineer для тэставання мабільных аплікацый на платформах iOS і Android. Таксама студыя шукае Junior 2D мастака для стварэння выяў з выкарыстаннем нейрасетак.

Распрацоўшчыку аплікацый BP Mobile у каманду патрэбны Junior Front-end Developer з досведам 1-3 гады. Ён будзе займацца распрацоўкай поўнаэкранных баннераў, лэндынгаў, SPA front-end аплікацый, сайтаў кампаніі.

RocketData, якая распрацоўвае платформу для кіравання інфармацыяй, патрэбны менеджар па продажах (без досведу). Навічку кампанія гатова плаціць ад 1,4 да 3,1 тыс. рублёў нэта. Таксама ёсць прапанова для Technical support (Junior+Python Developer) з досведам 1-3 гады.

«Т-Банк» (экс-«Тинькофф»), верагодна, ужо закрыў шмат пазіцый падчас актыўнага мінулагодняга хайрынгу. За апошні месяц кампанія размясціла толькі некалькі вакансій. Сярод іх ёсць прапанова для бізнес-аналітыка (Junior+, Middle) з досведам 1-3 гады.