Адна з першых альтэрнатыўных крам аплікацый, якія з’явіліся ў Еўрасаюзе пасля ўступлення ў сілу Digital Markets Act, спыняе працу. Setapp Mobile — мабільная версія падпісачнага сэрвісу кампаніі MacPaw — будзе зачынена ў лютым гэтага года.
Адна з першых альтэрнатыўных крам аплікацый, якія з’явіліся ў Еўрасаюзе пасля ўступлення ў сілу Digital Markets Act, спыняе працу. Setapp Mobile — мабільная версія падпісачнага сэрвісу кампаніі MacPaw — будзе зачынена ў лютым гэтага года.
Setapp Mobile запусціўся ў верасні 2024 года і стаў адной з найбольш прыкметных альтэрнатыў App Store у ЕС. Сэрвіс прапаноўваў дзясяткі аплікацыый у катэгорыях прадуктыўнасці, фінансаў, крэатыву, відэа і фота. Доступ да ўсіх мабільных аплікацый надаваўся па падпісцы за $9,99 у месяц, але толькі для карыстальнікаў, чый Apple ID быў зарэгістраваны ў краіне ЕС.
Кампанія паведаміла, што ўсе аплікацыі будуць выдалены з Setapp Mobile да 16 лютага 2026 года. Пры гэтым дэсктопная версія Setapp працягне працу і закрыццё яе не закране.
У MacPaw патлумачылі закрыццё тым, што «пастаянна зменлівыя і складаныя камерцыйныя ўмовы» больш не адпавядаюць бягучай бізнес-мадэлі сэрвісу. Гаворка ідзе пра новыя правілы, якія ўвяла Apple для аплікацый і альтэрнатыўных крам у ЕС пасля ціску з боку рэгулятараў.
Ключавой праблемай стала заблытаная сістэма збораў, уключаючы так званы Core Technology Fee — плату ў памеры €0,50 за кожную першую ўсталёўку аплікацыю звыш аднаго мільёна за апошнія 12 месяцаў. Хоць Apple перагледзела сваю палітыку, каб пазбегнуць далейшых санкцый, структура камісій, на думку распрацоўшчыкаў, стала яшчэ складанейшай і менш прадказальнай.
У Setapp адзначаюць, што з-за пастаянных змяненняў распрацоўшчыкам становіцца цяжка планаваць рост і манетызацыю. Гэта, у сваю чаргу, ставіць пад сумнеў жыццяздольнасць альтэрнатыўных крам аплікацый у ЕС пры бягучых умовах.
Нягледзячы на закрыццё Setapp Mobile, альтэрнатыўныя крамы аплікацый у ЕС працягваюць існаваць. Сярод найбольш прыкметных — Epic Games Store ад стваральнікаў Fortnite і open-source-праект AltStore. Пры гэтым сыход аднаго з першых гульцоў рынку паказвае, што новая мадэль рэгулявання пакуль не гарантуе ўстойлівыя ўмовы для альтэрнатыў App Store у Еўропе.
Рэлацыраваліся? Цяпер вы можаце каментаваць без верыфікацыі акаўнта.