Топавая пляцоўка для фрылансераў звольніла амаль траціну штату

Як адзначыў у абвестцы заснавальнік і гендырэктар Fiverr Міша Кауфман, кампанія мае намер актыўна ўкараняць ШІ. Раней аб планах перайсці на ШІ-арыентаваную мадэль абвясціла моўная аплікацыя Duolingo.

Кауфман падае гэтыя падзеі як вяртанне да працы ў «рэжыме стартапа». Яго мэта — зрабіць кампанію больш ашчаднай і хуткай, каб у яе была сучасная інфраструктура, сфакусаваная на ШІ, меншая каманда, у якой кожны чалавек значна прадуктыўнейшы, і нашмат менш узроўняў менеджменту. Таксама ён апраўдвае звальненні тым, што для функцыянавання кампаніі сёння не патрэбна столькі людзей, колькі ў яе было, бо яна ўжо ўбудавала ШІ у падтрымку і антыфрод-сістэму.

Пра пагрозу ШІ для супрацоўнікаў Кауфман казаў у адным з майскіх інтэрв’ю. Ён раіў людзям цалкам аўтаматызаваць сваю працу, але разам з тым сцвярджаў, што гэта не прывядзе да іх замены, бо за імі застанецца нестандартнае мысленне і прыняцце рашэнняў. Траціне яго ж супрацоўнікаў гэтая парада, відавочна, не вельмі дапамагла.