Opera прэзентавала ШІ-браўзер, які ўмее пісаць код

Opera упершыню расказала аб распрацоўцы Neon у маі, але да гэтага часу прадукт знаходзіўся ў рэжыме закрытага тэставання. Цяпер кампанія пачала рассылку запрашэнняў абмежаванай колькасці карыстальнікаў, астатнія могуць запісацца ў ліст чакання.

У браўзеры ёсць убудаваны чат-бот, а таксама функцыя агента Neon Do, якая выконвае задачы з улікам гісторыі праглядаў. Карыстальнік можа, напрыклад, папрасіць сістэму пераказаць артыкул і адправіць кароткі змест у Slack ці нагадаць дэталі відэа, прагледжанага на Youtube.

Яшчэ адна ключавая асаблівасць — функцыя Cards, якая дазваляе захоўваць і камбінаваць паўтаральныя промпты. Карыстальнік можа стварыць карткі для пошуку, параўнання тавараў ці фармавання табліц.

Дадаткова ў браўзер убудавана сістэма Tasks, якая аб’ядноўвае ўкладкі і ШІ-чаты ў асобныя працоўныя прасторы. Neon таксама здольны пісаць фрагменты кода і ствараць візуальныя справаздачы з табліцамі і графікамі.

З выхадам Neon Opera ўступае ў канкурэнцыю з іншымі ШІ-браўзерамі. У апошнія месяцы на рынак выйшлі Perplexity Comet, Dia ад The Browser Company і ChatGPT Agent ад OpenAI. Google і Microsoft таксама актыўна ўкараняюць ШІ-функцыі ў свае браўзеры.