Кітайскія ўлады выціскаюць Nvidia з краіны

Афіцыйнай забароны на GPU H20 ад Nvidia, кастамізаваныя для кітайскага рынку, няма. Аднак іх карыстальнікаў заклікалі аддаваць перавагу кітайскім альтэрнатывам, у прыватнасці, ад Huawei.

Інфармацыя пра Тайныя правілы супраць Nvidia у Кітаі ўпершыню з’явілася ў маі, калі Тhe Information паведаміла, што кітайскія рэгулятары папрасілі мясцовыя кампаніі скараціць заказы чыпаў Nvidia і закупляць больш айчынных. Bloomberg на мінулым тыдні таксама паведамляў, што мясцовых пакупнікоў заклікаюць трымацца далей ад заморскай кампаніі.

У Міністэрстве прамысловасці і інфарматызацыі Кітая, якое курыруе паўправадніковую і АІ-сферу ў краіне, ніякіх заяў з гэтай нагоды не рабілі. На запыт SCMP наконт каментара ні там, ні ў Nvidia не адказалі.

Чыпы H20 карыстаюцца папулярнасцю ў Кітаі нягледзячы на тое, што Nvidia абмежавала іх прадукцыйнасць для адпаведнасці амерыканскім санкцыям. Продажы H20 стабільна растуць ад моманту рэлізу на пачатку гэтага года. Гэта звязана з тым, што «ў камплекце» з імі Nvidia дае тэхнічную падтрымку і абслугоўванне. Сёлета Nvidia мае намер паставіць у краіну больш за мільён асобнікаў, што прынясе ёй больш як $12 млрд выручкі.

Разам з тым у Кітаі атрымліваюць усё шырэйшае распаўсюджанне АІ-чыпы мясцовага паходжання. Напрыклад, дзяржаўны аператар China Telecom распрацаваў дзве вялікія моўныя мадэлі і навучаў іх цалкам на мясцовых АІ-паскаральніках. Пастаўшчыка там не ўдакладнілі, але з высокай верагоднасцю гэта была Huawei.

Незадоўга да гэтага Huawei пачала прапаноўваць узоры свайго новага працэсара Ascend 910 °C буйным кітайскім серверным кампаніям для тэсціравання і наладжвання абсталявання. Таксама Huawei наблізілася да камерцыйнага запуску свайго абноўленага чыпа 910В, які не саступае папулярным АІ-чыпам A100 ад Nvidia.