Николай Чикишев 31 сакавіка 2023, 10:44

Заснавальнікі NtechLab сышлі з кампаніі пасля спрэчак з нагоды працы ў Расіі

Аляксандр Кабакоў і Арцём Кухарэнка пакінулі кампанію праз рознагалоссі з кіраўніцтвам і інвестарамі.

Са слоў заснавальнікаў NtechLab, яны хацелі, каб кампанія спыніла ўсю працу ў Расіі і вывезла супрацоўнікаў з краіны. Кіраўніцтва NtechLab хацела працягваць працаваць у Расіі. «Большасць акцыянераў падтрымалі кіраўніцтва, таму ў нас не было іншага выбару, акрамя як сысці з кампаніі», — растлумачыў Кухарэнка.

Яны расказалі Reuters, што пачалі абмяркоўваць спыненне працы ў Расіі пасля атручвання палітыка Аляксея Навальнага ў жніўні 2020 года. «Стала ясна, што краіна рухаецца да катастрофы, хоць ніхто ўявіць сабе не мог, што краіна пачне вайну», — заявіў Кухарэнка. Цяпер абодва бізнэсоўцы знаходзяцца не ў Расіі.

Кабакоў пакінуў краіну ў снежні 2021 года, Кухарэнка — у сакавіку 2022 года. Абодва падпісалі петыцыю супраць вайны. У ліпені 2022 года CNews пісала, што бізнэсоўцы сышлі з кіраўніцтва кампаніі. NtechLab займаецца распрацоўкай сістэм распазнавання твараў, адзін з уладальнікаў кампаніі — дзяржкарпарацыя «Растэх». Тэхналогіі NtechLab выкарыстоўваюцца ў гарадскіх сістэмах відэаназірання ў Расіі.