Заснавальніца беларускай ІТ-кампаніі атрымала сур'ёзныя траўмы на гарналыжным курорце. Вы можаце ёй дапамагчы

Падчас спуску Наталля на вялікай хуткасці сутыкнулася з іншым лыжнікам. Ад удару яе адкінула на камяні за межы трасы. У выніку аварыі Наталля атрымала мноства вельмі цяжкіх траўмаў: пералом правай сцегнавой косткі, рукі, хрыбта, шматлікія цяжкія пераломы твару, сатрасенне мозгу, выбітыя амаль усе зубы і скразны разрыў шчакі.

Дзяўчына доўгі час ляжала на снезе з масіўнай стратай крыві і высокай рызыкай памерці ад балявога шоку — рэанімацыю чакалі каля 5 гадзін. Увесь гэты час Наталля заставалася ў прытомнасці.

Бліжэй да поўначы яе даставілі ў шпіталь. У Грузіі яна правяла 9 дзён у рэанімацыі — урачы стабілізавалі яе стан і выконвалі экстраныя аперацыі на назе і руцэ. Там яна заразілася мультырэзістэнтнымі шпітальнымі бактэрыямі, якія ўстойлівыя да большасці антыбіётыкаў — гэта рэзка ўскладніла лячэнне і запаволіла загойванне.

З-за сур’ёзных траўмаў твару Наталлі пачалі шукаць клініку ў Германіі. У яе дыягнаставаны пераломы сярэдняй часткі твару, верхняй і ніжняй сківіцы, а таксама пералом вачніцы з рызыкай страты зроку. У Германію Наталлю эвакуявалі на спецыялізаваным медыцынскім самалёце, абсталяваным для перавозкі пацыентаў у цяжкім стане. Дактары правялі 8-гадзінную аперацыю, фактычна збіраючы твар дзяўчыны нанова.

Бягучыя медыцынскія выдаткі і транспарціроўка ўжо перавысілі €160 тысяч. Наперадзе Наталлю чакаюць шматэтапныя аперацыі, складанае лячэнне і працяглая рэабілітацыя, кошт якіх пакуль немагчыма ацаніць. Зараз Наталля знаходзіцца і будзе ў бліжэйшы месяц знаходзіцца ў берлінскай клініцы Unfallkrankenhaus Berlin Rettungsstelle.

Блізкія Наталлі адкрылі збор для дапамогі сям'і. Падтрымаць яе можна тут.