«Нават кароткага сазвону для знаёмства не было!» Бэт-кампанія адмовіла кандыдатцы па галасавых

Дзяўчына расказала, што яна пакуль працы актыўна не шукае, бо «сякія-такія задачы» ў яе ёсць, але калі рэкруцёры клічуць на інтэрв’ю — не адмаўляецца.

І вось ёй напісала эйчарка з бэт-кампаніі і прапанавала разгледзець вакансію. Аўтарка паста ўступіла ў перапіску, прачытала апісанне вакансіі і на прапанову эйчаркі накідала спіс з 8-9 пытанняў, на 7 з якіх атрымала адказы — але самыя важныя засталіся не закрытыя, удакладняе яна.

Гэта крыху напружыла топікстартарку, але яна вырашыла, што высветліць усё, што яе хвалюе, на наступным этапе — то-бок на сазвоне (а гэты этап дзяўчына для сябе разумела як перадсумоўе). 

— Потым яна мне даслала пералік сваіх пытанняў з 12-13 штук. Адкажыце! З пазнакай: калі хочаце, дасылайце галасавым адказы. Я прыкінула, што пісаць будзе доўга, і адказы нагаварыла — адправіла. І наўздагон яшчэ адправіла спасылку на [профіль у] LinkedIn. Адзначу, што з майго рэзюмэ цалкам ясна, калі вывучаць не «па вярхах», што ў igaming мяне пакуль не было, — расказвае піяршчыца.

Праз суткі кандыдатка атрымала адказ, што ўсё гэта яе суразмоўніца «адправіла калегам». А яшчэ праз суткі — паведамленне, што аўтарка паста кампаніі не пасуе. 

«Не і не, без крыўд! — аднак топікстартарка не хавае, што методыкі правядзення інтэрв’ю яе ўсё ж здзівілі. — Бо нават кароткага сазвону для знаёмства не было!» Таму яна вырашыла высветліць у эйчаркі кампаніі, як яны вядуць адбор — толькі па галасавых, без размовы са спецыялістамі аддзела, куды патрабуецца супрацоўнік?

Дзяўчына выклала скрын сваёй перапіскі з эйчаркай, прыбраўшы ўсю асабістую інфармацыю. Ёй адказалі, што адбор праводзіўся па CV, профілі ў LinkedIn, партфоліа і «разгорнутых удакладняльных пытаннях пра вопыт у рамках цікавых нам блокаў». Галасавое паведамленне — гэта проста спосаб удакладнення інфармацыі.

— Мы (як працадаўца) пакідаем за сабой права па выбары метаду адбору кандыдатаў. Шкада, што вам дадзены падыход не пасуе, — так заканчваецца перапіска.

Аўтарка паста дадала, што яна тэму развіваць не стала, бо гэта немінуча прывяло б да сваркі, але высновы зрабіла. «Звычайна я прашу дэталёвы фідбэк для працы над памылкамі на будучыню. А тут, прызнацца, моцна расчаравалася падыходам. Вельмі спадзяюся, што такія сумоўі не паўсюдныя».

А ці былі ў вас падобныя сітуацыі і адмовы? Пішыце ў каментарах.

QA атрымаў офер і тут жа пазбавіўся яго. Думае, праз адмову праходзіць паліграф і жарты пра коцікаў

Па тэме

QA атрымаў офер і тут жа пазбавіўся яго. Думае, праз адмову праходзіць паліграф і жарты пра коцікаў