Колькі айцішнікі ў Польшчы губляюць на падзенні злотага і як рэагуюць кампаніі
Рэлаканты ў Польшчы падлічваюць «страты» праз курсавыя ваганні. На мінулым тыдні курс пераадолеў пазнаку ў 5 PLN за 1 USD (на гэтым тыдні ўжо 4,8 PLN). У большасці польскіх кампаній, у тым ліку з беларускімі каранямі, заробкі не прывязаныя да долара.
10+ гісторый, якімі з намі падзяліліся, вельмі падобныя: зп у злотых, перагляды раз на год, індэксацыі няма — толькі ў адным выпадку кампанія прапанавала кампенсаваць падзенне зп гадавой прэміяй. Большасць суразмоўцаў прыглядаюцца да рынку.
А вось вынікі апытання ад канала @dzikpic.
Дзелімся некалькімі кейсамі.
«Больш за ўсіх незадаволеныя тыя, хто пераехаў яшчэ ў 2020 годзе»
— У Польшчу пераехаў у красавіку 2022. Працую ў прадуктовай кампаніі. Ва ўсіх кантракты ў злотых. Кампанія заробак не індэксуе.
Пры рэлакацыі заробак разлічылі паводле курса 4,3 злотых за долар, і чыстымі ён застаўся такім жа, як у Беларусі. Заробак за верасень у доларавым эквіваленце пры цяперашнім курсе прасядзе, паводле маіх разлікаў, на 12-13% у параўнанні з заробкам пры пераездзе. Больш за ўсіх незадаволеныя тыя, хто пераехаў яшчэ ў 2020 годзе, калі курс долара быў ніжэйшым за 4.
Беларускія супрацоўнікі спрабавалі растлумачыць амерыканскаму кіраўніцтву, што хочуць кантракты ў доларах, як у Беларусі, але безвынікова.
Магчыма, пытанне не вырашаецца і ў сувязі з тым, што ў новага СЕО свае планы. Пасля адкрыцця польскага хаба кампанія стварыла хаб у Індыі, дзе актыўна хайрыць, а ў Польшчы хайрынг закрылі.
Калегі чакаюць Новага года, калі будуць планавыя перагляды заробкаў. Потым, хутчэй за ўсё, паволі пачнуць сыходзіць тыя, хто не зможа дамовіцца на новыя грошы/ўмовы. Асабіста ў мяне цяпер няма ніякага плана: атрымаю blue card, папрацую год, пагляджу, як будзе развівацца сітуацыя.
«Сышоў, працую па b2b у амерыканскай кампаніі з прывязкай да долара»
— У Беларусі працаваў у прадуктовай кампаніі з брытанскімі каранямі. У польскі офіс кампаніі пераехаў у сакавіку гэтага года. У Беларусі заробак быў прывязаны да долара, у Польшчы — не. Прычым пры рэлакейце беларускі заробак праіндэксавалі паводле курса 3,8, хоць на момант пераезду курс ужо быў 4,3.
За тры месяцы працы ў новай лакацыі страціў прыкладна 1,8 тысячы долараў (чыстымі) адносна заробку нета ў Беларусі.
Потым ва ўсёй кампаніі было рэв’ю, заробак чыстымі стаў амаль як у Беларусі, на 100-200 долараў меншы. Але ў выніку я вырашыў звольніцца. Цяпер працую па b2b у прадуктовай амерыканскай кампаніі, заробак прывязаны да долара, вырас прыкладна на 15-20%. У год выходзіць 90 тысяч долараў.
«За датэрміновае звальненне — штраф, + трэба вярнуць рэлакейт-бонус»
— Працую ў прадуктовай кампаніі. У Польшчу пераехаў у чэрвені 2022. У варшаўскім офісе працуе каля 400 чалавек.
У мяне кантракт на 2 гады, заробак у злотых. У сувязі з падзеннем курса злотага да долара кампанія не рабіла ніякіх індэксацый.
Я ўжо вывучаю вакансіі ў іншых кампаніях, дзе заробак прывязаны да долара. Але іншых крокаў не раблю і не скарджуся. Я звязаны ўмовамі дамовы, за парушэнне якіх у кампаніі прадугледжаныя вялікія штрафы.
Так, калі вы звальняецеся да заканчэння кантракта, то вам прыйдзецца заплаціць штраф у памеры двухмесячнага заробку, кампенсаваць аплату юрыдычнага суправаджэння рэлакейту ў памеры 5 тысяч долараў і выплаціць рэлакейт-бонус. У маім выпадку гэта 14 тысяч долараў, якія кампанія выплаціла на ўсю маю сям’ю пры пераездзе.
Але пасля паўтара года кантракта штомесяц бонус за рэлакацыю, які прыйдзецца выплаціць пры датэрміновым звальненні, памяншаецца на 10%. Па заканчэнні тэрміну кантракта можна звальняцца без абавязкаў.
«Пры рэлакейце твой заробак пераводзяць у злотыя паводле курса на дзень заключэння кантракта»
— Працую ў амерыканскай аўтсорсінгавай кампаніі, ёсць і свае прадукты. Штат каля 2 тысяч чалавек. Офісы ў краінах ЕС, ЗША, Беларусі, Украіне.
Асабіста я ў Польшчы пакуль не жыву. Але паводле слоў некаторых калегаў, што пераехалі, іх заробкі ў доларах упалі на 20%. У польскім офісе, у адрозненне ад беларускага, няма прывязкі да долара. Пры рэлакейце твой заробак пераводзяць у злотыя паводле курса на дзень заключэння кантракта. А далей выплачваюць гэтую фіксаваную суму ў злотых незалежна ад змянення курса.
Кампанія адмаўляецца індэксаваць заробак, нягледзячы на выручку ў доларах. Частка супрацоўнікаў плануе звольніцца і шукаць іншую працу, калі ім у індывідуальным парадку не перагледзяць заробак.
Я збіраюся рэлакавацца ў лістападзе. У кантракце заробак у злотых пералічаць ужо паводле новага курса. Акрамя таго, у лістападзе якраз будзе перагляд заробку — пры пераездзе ў Польшчу яго перагледзяць з рэйтамі мясцовага рынку. Плюс кампанія выплаціць рэлакейт-бонус 2500 долараў чыстымі.
«У жніўні быў перагляд зп, але прыбаўка ў 10% на гайданне курса ўжо згарэла»
— Працую ў буйной аўтсорсінгавай кампаніі з беларускімі каранямі, штат 3+ тысячы чалавек. Больш за год жыву з сям’ёй ва Уроцлаве. Працую паводле ўмовы аб працы, заробак прывязаны да злотага.
У жніўні быў перагляд заробку, і я да жаданай сумы ў доларах дадала яшчэ 10% на гайданне курса. На жаль, гэтыя 10% ужо згарэлі.
Неаднаразова беларускія калегі, і я ў тым ліку, падымалі пытанне прывязкі заробку да долара, чаму польскія калегі моцна дзівяцца. «Навошта, ён жа і назад можа адпаўзці?»
На гэты момант ніякай схемы індэксацыі ў нас няма. Паводле слоў менеджменту, нібыта разглядаюць варыянты, але пакуль нічога не прыдумалі. Мне гэта здаецца дзіўным, бо кампанія — галера, і за людзей плацяць у валюце. Застаецца спадзявацца, што ўсе калегі будуць абурацца і кампаніі прыйдзецца перагледзець падыход да налічэння заробкаў.
«Вы, спадарства, у Польшчы, а тут усе атрымліваюць заробак у злотых. Прывыкайце»
— Працую ў Польшчы па b2b на кампанію з беларускімі каранямі. Заробак у злотых. Перагляды раз на год. Ніякай індэксацыі няма. За мінулы год, пакуль не было перагляду, заробак упаў на 500 долараў. Нядаўна было павышэнне на 500 долараў у эквіваленце. Але на момант выстаўлення інвойса яны ператварыліся ў 400 долараў.
Ужо некалькі месяцаў кампанія кажа, што спрабуе прадумаць варыянты кампенсацыі. Да таго ж ёсць аргумент: «Вы, спадарства, у Польшчы, а тут усе атрымліваюць заробак у злотых. Прывыкайце». Гаворкі пра кампенсацыю гадавой інфляцыі таксама не вядзецца. Таму планую неўзабаве шукаць новую працу.
«EPAM пакуль не індэксуе»
— У польскі офіс EPAM пераехаў пару месяцаў таму. Пры рэлакацыі мой заробак брута павялічыўся на 45%. У некаторых менш дасведчаных калег рост быў яшчэ большы — на 50-100% у параўнанні з беларускім заробкам.
Але цяпер праз падзенне курса мой заробак у доларах упаў і стаў амаль аналагічным беларускаму. EPAM пакуль нічога не індэксуе. Калі так працягнецца, пайду размаўляць з менеджарам пра павышэнне.
«Паабяцалі прэмію ў памеры 15% ад заробку»
— Пераехаў у Польшчу ў 2021 годзе. На пачатку гэтага года знайшоў новую працу ў буйной міжнароднай кампаніі з офісамі ў Польшчы. Прапанова на галаву пераўзыходзіла ўсе астатнія, якія ў мяне былі ці якія нават былі агучаныя ў якасці мажлівасцей у іншых вакансіях. Пасля пачатку вайны курс злотага рэзка пайшоў уніз, і на сёння я страціў каля 20% заробку бруднымі. Чыстымі сітуацыя трохі лепшая, бо ўлетку падаткі трохі зменшыліся.
Уздымаў пытанне са сваім менеджментам, сказалі, што пакуль нічога не змогуць зрабіць, але паабяцалі да канца года прэмію ў памеры 15% ад гадавога заробку. Радуе, вядома, але праблемы не вырашае. На пачатку 2023 года чакаецца перагляд заробку. Спадзяюся павялічыць заробак у доларах да ўзроўню пачатку гэтага года. А пакуль на ўсялякі выпадак разглядаю іншыя вакансіі.
А як у вас?
Читать на dev.by