«У нас са сваіх чарга». Ці пацясняць пакістанскія айцішнікі беларускіх
На пакістанскім сайце, які адсочвае працадаўцаў з ліцэнзіяй на працаўладкаванне за мяжой, з сакавіка пачалі з’яўляцца вакансіі для пакістанцаў у Беларусі. У асноўным гэта рабочыя спецыяльнасці: муляр, плітачнік. Прапануюць заробкі ад 500 да 600 даляраў.
На некаторых пакістанскіх сайтах актыўна рэкламуюць працу ў Беларусі пры «падтрымцы ўрада Пакістана». Сярод іншага апісваецца «праца ў ІТ з высокім заробкам». Пералічваюцца такія спецыяльнасці, як Software Developer, Web Designer, Network Engineer.
«У 2025 годзе многія пакістанцы шукаюць добра аплатную працу за мяжой, каб забяспечыць сябе і падтрымаць свае сем’і. Беларусь — прыгожая краіна ў Еўропе — цяпер стала новай магчымасцю для кваліфікаваных і некваліфікаваных пакістанскіх працаўнікоў. Урад Пакістана плануе адпраўку падрыхтаваных працаўнікоў у Беларусь для працы па розных напрамках, дзе прапануюцца добрыя заробкі і выдатныя ўмовы», — так рэкламуюць Беларусь на адным з пакістанскіх сайтаў.
Калі ж пераходзіць па спасылках, канкрэтныя вакансіі ў ІТ не прыводзяцца.
«У іх добрая англійская, яны аўтсорсяць на ўвесь свет»
Беларускі падарожнік Аляксандр Гойшык летась правёў у Пакістане пяць тыдняў, у тым ліку наведаў новы каворкінг у Ісламабадзе і меў зносіны з мясцовымі айцішнікамі. Паводле ягоных слоў, найхутчэй пакістанскія спецыялісты не надта зацікаўленыя ў пераездзе ў Беларусь.
— У Пакістане моцная сацыяльная стратыфікацыя, ёсць багатыя раёны, у тым жа Ісламабадзе. Людзі там вельмі працавітыя. Каго ні сустрэну, усе адказваюць, што яны бізнесмены. У іх ёсць прадпрымальніцкая жылка. Некваліфікаваныя работнікі, можа, і зарабляюць, як у Беларусі. А кваліфікаваныя спецыялісты зарабляюць значна лепш, у іх больш магчымасцяў. Усе вывучаюць англійскую мову. Беларусь не зможа забяспечыць ім такі ж узровень заробкаў. Побач у іх нафтавыя манархіі, падобны клімат, туды лёгка прыехаць папрацаваць. У Беларусі для іх халодны клімат, нізкія заробкі, праблемы ксенафобіі. Хто з іх быў у Беларусі, адразу згадваюць, што там холадна, — кажа Гойшык.
Суразмоўца адзначае, што ІТ-спецыялісты ў Пакістане адчуваюць сябе нядрэнна дзякуючы добраму валоданню англійскай мовай і могуць працаваць на аўтсорс з многімі краінамі.
— Яны працуюць на аўтсорс, добра запатрабаваныя, у іх шмат маленькіх стартапаў, усё развіваецца. Перад імі ўвесь свет, нашто ім Беларусь як пасярэднік, калі яны з дому могуць працаваць на ўвесь свет дзякуючы добрай англійскай, — кажа суразмоўца.
devby распытаў сузаснавальніка і дырэктара аднаго з першых каворкінгаў у Пакістане, у Ісламабадзе, Джафангіра Афзала пра тое, ці можа Беларусь быць прывабнай для ІТ-спецыялістаў з Пакістана.
Ён адказаў, што асноўныя напрамкі эміграцыі для ІТ-спецыялістаў з Пакістана — гэта ЗША, Канада, Вялікабрытанія і Аўстралія. А пасля нядаўніх эканамічных і глабальных зменаў узросла цікавасць таксама да Саудаўскай Аравіі і ААЭ.
— Што да аўтсорсу, ІТ-спецыялісты з Пакістана найчасцей працуюць з кліентамі з ЗША, Вялікабрытаніі, Канады, Аўстраліі, Саудаўскай Аравіі і ААЭ. Таксама ў спіс уваходзяць Германія, Швецыя, Нарвегія, Фінляндыя і іншыя, — адзначыў суразмоўца.
Беларусь, на яго думку, «не з’яўляецца прыярытэтным выбарам, але можа разглядацца як патэнцыйны напрамак пры наяўнасці істотных стымулаў», напрыклад:
- Спрошчаная працэдура атрымання пастаяннага віду на жыхарства.
- Зразумелы план кар’ернага росту або шлях міграцыі ў ЕС.
- Спрашчэнне вядзення бізнесу для стартапаў з мінімумам фармальнасцей і падаткаў.
- Наяўнасць працоўных месцаў у добрых ІТ-кампаніях.
- Сацыяльныя бенефіты, такія як ахова здароўя, адукацыя і г. д.
devby вывучыў некалькі сабрэдзітаў на Reddit, дзе пакістанцы актыўна абмяркоўвалі навіну пра магчымасць паехаць у Беларусь. Большасць адрэагавалі на такую прапанову з гумарам.
«У нас са сваіх чарга»
Журналіст devby патэлефанаваў на некалькі буйных беларускіх дзяржаўных прадпрыемстваў, дзе патрабуюцца ІТ-спецыялісты. Прадставіўся супрацоўнікам кадравага агенцтва, якое працуе з замежнымі грамадзянамі.
Пытанне заспела кадравікоў знянацку. Хаця некаторыя вакансіі вісяць у банку вакансій па некалькі месяцаў і больш, са старту ўзяць на працу выхадцаў з Пакістана не згадзіўся ніхто.
«Ой, я нават і не ведаю… У нас тут сярод сваіх грамадзян Беларусі конкурс, трэба глядзець», — адказалі на адным з найбуйнейшых беларускіх заводаў, дзе ўжо даўно шукаюць праграміста на заробак да 700 долараў.
На іншым прадпрыемстве адказалі: «Ой, такія пытанні трэба з дырэктарам вырашаць, я нават і не ведаю…».
«Могуць разглядаць як прамежкавы этап»
Адаптацыя, веданне мовы, зацікаўленасць у беларускім рынку — такія праблемы перад прыездам пакістанцаў у Беларусь бачыць старэйшая навуковая супрацоўніца BEROC Анастасія Лузгіна. Эканамістка звяртае ўвагу, што грамадзянам Пакістана адкрыты шлях у Аб’яднаныя Арабскія Эміраты і іншыя краіны.
— У Пакістане добры ўзровень валодання англійскай мовай, а ў Беларусі далёка не ўсе могуць на ёй свабодна размаўляць. Першапачаткова асноўны кірунак для працоўнай міграцыі з Пакістана — гэта ААЭ, Катар, ЗША, ЕС. Беларусь яны могуць разглядаць як прамежкавы этап на шляху рэлакацыі ў ЕС. Беларускія заробкі не канкурэнтныя ў параўнанні з заробкамі ў ААЭ, ЗША і ЕС. Слабая матывацыя ў плане даходаў не дае падстаў чакаць, што ў Беларусь прыедуць 150 000 пакістанцаў. Гэта можа быць значна менш у маштабах. Гэта не вырашыць праблему на беларускім рынку вакансій, — лічыць экспертка.
Беларускія ўлады не раз казалі пра праблему кадравага дэфіцыту, якую абяцалі вырашаць з дапамогай пенсіянераў, непрацуючых грамадзян і замежнікаў. Цяпер у Беларусі працуе 60 000 замежных грамадзян, за год іх колькасць вырасла больш чым удвая. Каля 40% з іх прыехалі з Расіі.
Читать на dev.by