Panasonic скарачае 10 тысяч чалавек

Палова звальненняў прыпадзе на Японію, другая палова — на іншыя краіны. У асноўным яны адбудуцца ў бягучым фінансавым годзе. Паводле ацэнак кампаніі, рэструктурызацыя абыдзецца ёй у 895 мільёнаў даляраў.

Гендырэктар Panasonic Юкі Кусумі падчас фінансавай справаздачы гаварыў пра неабходнасць звальненняў, каб падрыхтаваць кампанію да наступных дзесяцігоддзяў. Ён адзначыў, што вельмі шкадуе, але калі не пайсці на радыкальнае скарачэнне выдаткаў цяпер, рост кампаніі апынецца пад пагрозай.

107-гадовая кампанія засяродзіцца на такіх напрамках, як энергаэфектыўная генерацыя і крыніцы сілкавання для сховішчаў энергіі і ЦАДаў, а таксама працягне развіваць падраздзяленні па вытворчасці акумулятараў для электрамабіляў і электронікі для «разумнага дома». Panasonic, напрыклад, пастаўляе літый-іённыя батарэі для Tesla.

Як адзначае Bloomberg, Panasonic пашырае вытворчасць акумулятараў у ЗША. Чысты прыбытак кампаніі па выніках квартала, які завяршыўся ў сакавіку, вырас больш, чым чакалася, — на 74%. Продажы яе амерыканскіх падраздзяленняў растуць, але ў іншых краінах попыт падае. У лютым кампанія заяўляла, што плануе аптымізаваць падраздзяленні, якія не дэманструюць значнага росту, напрыклад, прамысловых прылад і тэлевізараў.