PayPal стане першым плацежным сэрвісам у ChatGPT

Як паведаміў генеральны дырэктар PayPal Алекс Крыс, партнёрства дазволіць уладальнікам кашалькоў PayPal здзяйсняць бяспечныя плацяжы ў ChatGPT, а прадаўцам — размяшчаць свае тавары ў сістэме.

Угода ўмацоўвае стратэгію OpenAI па пераўтварэнні ChatGPT у платформу для электроннай камерцыі. Пасля дадання функцый Instant Checkout і кнопкі Buy Now карыстальнікі ўжо маглі купляць тавары з Etsy, Shopify і Walmart.

Кампанія падкрэсліла, што PayPal будзе адказваць не толькі за саму аплату, але і за маршрутызацыю плацяжоў, верыфікацыю прадаўцоў, абарону ад махлярства і вырашэнне спрэчак. Крыс адзначыў, што «усе ўдзельнікі — і пакупнікі, і прадаўцы — праходзяць праверку PayPal, што мінімізуе рызыкі».

Карыстальнікі змогуць аплачваць пакупкі сродкамі з прывязаных картак, банкаўскіх рахункаў ці ўнутранага балансу PayPal. Усе транзакцыі будуць суправаджацца стандартнымі гарантыямі: адсочваннем пасылак, вяртаннямі і абаронай пакупніка.

Эксперты называюць гэты крок пачаткам «агенцкай камерцыі» — новага пакалення анлайн-шопінгу, дзе ШІ становіцца персанальным кансультантам і пасярэднікам паміж карыстальнікам і прадаўцом. Як адзначыў Крыс, «цяжка ўявіць будучыню гандлю без такіх інтэлектуальных агентаў».