БДУІР набраў платнікаў. Ахвотных больш, чым у 2024, а на радыётэхніцы і электроніцы буст 8Х

План набору на дзённае платнае аддзяленне ў гэтым годзе ў БДУІР змяніўся нязначна. Калі ў мінулым годзе для платнікаў было выдзелена 910 месцаў, то ў гэтым годзе 935. Планавы набор вырас толькі на трох факультэтах: факультэт камп’ютарных сістэм і сетак, факультэт камп’ютарнага праектавання, факультэт радыётэхнікі і электронікі.

Паводле інфармацыі кіраўніцтва БДУІР, абітурыенты падалі 1087 заяваў — на 9% больш, чым годам раней. У мінулым годзе кіраўніцтва ВНУ заяўляла пра 996 пададзеных заяваў. Рашэннем прыёмнай камісіі да залічэння на першы курс рэкамендавана 907 абітурыентаў. У мінулым годзе было залічана больш за 900 абітурыентаў. Больш дакладную лічбу ў БДУІР тады не агучылі.

Мяркуючы па статыстычнай справаздачнасці на сайце ўніверсітэта, на самы папулярны факультэт камп’ютарных сістэм і сетак было падана 295 заяваў — амаль столькі, колькі і ў мінулым годзе.

А найбольш вырасла колькасць жадаючых вучыцца платна на факультэце радыётэхнікі і электронікі. Калі ў мінулым годзе, паводле дадзеных статыстычнай справаздачнасці БДУІР, абітурыенты падалі ўсяго 5 заявак на 30 выдзеленых месцаў, то ў гэтым годзе 41 заяву на 35 вылучаных месцаў (у 8 разоў больш).

Таксама вырасла колькасць заяваў ад жадаючых вучыцца за грошы на факультэце інфармацыйнай бяспекі (+60%), камп’ютарнага праектавання (+36%), інфармацыйных тэхналогій і кіравання (+11%). А вось на інжынерна-эканамічны факультэт колькасць заяваў у параўнанні з мінулым годам нязначна скарацілася (-2%).

Агульны конкурс на дзённае платнае аддзяленне склаў 1,18 чалавека на месца (зыходзячы са статыстыкі на сайце БДУІР).

Самы высокі праходны бал у гэтым годзе на спецыяльнасць «праграмная інжынерыя» (ФКСіС) — 363 балы. У мінулым годзе ён быў ніжэйшы (359). На другім месцы «штучны інтэлект» (ФІТУ) 347 балаў, на трэцім «праграмная інжынерыя» (ФКП) — 345 балаў.

Самая папулярная спецыяльнасць (зыходзячы з колькасці пададзеных заяваў) таксама «праграмная інжынерыя». У гэтым годзе абітурыенты падалі 157 заяваў. У мінулым годзе жадаючых было крыху больш — 168 заяваў. На гэтую спецыяльнасць аказаўся і самы вялікі конкурс — амаль 2,5 чалавека на месца.

У топ-3 папулярных спецыяльнасцяў «электронная эканоміка» (інжынерна-эканамічны факультэт) — 117 заяваў (у 2024 — 125) і «інфармацыйныя сістэмы і тэхналогіі» (ФІТУ) — 113 заяваў (133).

Менш за ўсё заяваў (адна на пяць вылучаных месцаў) было пададзена ад жадаючых вучыцца на спецыяльнасці «звышвысокачастотныя сістэмы» (ФІБ).