Playtika афіцыйна ліквідуе бізнэс у Беларусі

Афіцыйна працэдура ліквідацыі кампаніі была запушчаная пры канцы красавіка. Рашэнне было прынятае ўласнікам.

Між тым на афіцыйным сайце Playtika Беларусь усё яшчэ фігуруе ў пераліку лакацый, дзе ёсць офісы кампаніі. Таксама «Плэйтыка Бел» усё яшчэ лічыцца сярод рэзідэнтаў ПВТ. 

Пра сыход з Беларусі ізраільскай геймдэў-кампаніі Playtika стала вядома яшчэ ў студзені. Першапачаткова, паводле слоў супрацоўнікаў, планавалася, што беларуская каманда дапрацуе да канца лютага.

Пазней топ-менеджмент кампаніі скарэктаваў планы. Супрацоўнікам паведамілі, што апошні працоўны дзень для ўсіх, хто застанецца ў Беларусі — 30 красавіка. Пасля гэтай даты доступу да карпаратыўных рэсурсаў з Беларусі не будзе.

Зрэшты, фізічны офіс у Мінску быў закрыты для большасці супрацоўнікаў ужо ад пачатку сакавіка. Як расказала адная з крыніц, у лютым «са многімі інжынерамі завяршылі працоўныя адносіны, выплацілі ім заробак і гадавы бонус». 

Колькі супрацоўнікаў мінскага офіса было звольнена, а колькі працягвае працаваць, але ўжо ў іншых лакацыях, невядома. 

Анонс закрыцця офіса ў Мінску супаў з новым раўндам глабальных скарачэнняў у Playtika. Медыя паведамлялі, што скароцяць 300-400 супрацоўнікаў у розных лакацыях. Каманда ў Мінску чакала, што працу можа страціць да 50% офіса (каля 150 чалавек). 

Рэлакантам, паводле інфармацыі крыніц, кампанія яшчэ вясной прапанавала добрыя бонусы — але з адтэрміноўкай.

Напрыклад, рэлакантам, якія адпрацуюць у кампаніі да канца лета 2024, абяцаюць выплаціць бонус у памеры 4 заробкаў. А тыя, хто адпрацуе да канца красавіка 2025 года, атрымаюць пры канцы бонус у памеры 8 заробкаў.

Офіс распрацоўкі Playtika ў Мінску быў адкрыты ў 2012 годзе. На піку ў кампаніі працавала больш за 600 чалавек (пры канцы 2021 года). Мінскі офіс уваходзіў у топ-20 самых буйных ІТ-кампаній у Беларусі.

У квартальных справаздачах Playtika апошнімі гадамі Беларусь фігуравала сярод фактараў рызыкі. У фінансавай справаздачнасці за мінулы год Playtika згадала Беларусь у пераліку рызык, «звязаных з міжнароднымі аперацыямі і ўласнасцю».