Аддзел навін bel 5 чэрвеня 2025, 14:21

ДПК паведамляе, што Польшча не пускае аўтобусы з Беларусі. У Польшчы гэта адмаўляюць

Польскі бок спыніў прыём аўтобусаў у пункце пропуску «Тэрэспаль», паведамляе Дзяржаўны пагранічны камітэт.

Запуск аўтобусаў на тэрыторыю Польшчы кантрольныя службы прыпынілі з 10:00 раніцы 5 чэрвеня. Таксама з вечара 4 чэрвеня назіраюцца збоі ў прыёме легкавых аўтамабіляў.

Ужо больш за тры гадзіны чакаюць уезду ў Польшчу чатыры аўтобусы, аформленыя беларускай бокам. Афіцыйнай інфармацыі пра прычыны таго, што адбываецца, нашы памежнікі ад польскіх не атрымлівалі.

Усяго ў чарзе на выезд з Беларусі ў Польшчу знаходзяцца 1555 легкавых аўтамабіляў і 55 аўтобусаў.

Беларускія медыя звярнуліся па каментар у Надбужанскі аддзел Памежнай службы Польшчы, у падпарадкаванні якога знаходзіцца «Тэрэспаль». Там інфармацыю ДПК абверглі.

«Нічога такога няма. Рух інтэнсіўны — мы прымаем як аўтамабілі, так і аўтобусы. Перапынкаў у працы таксама не было. Усе віды транспарту прымаем і адпраўляем у звычайным рэжыме, як і ў любы іншы дзень», — адзначылі польскія памежнікі.